Elmira Ələkbərzadəni şou-biznesdə az görünən və az danışan sənətçi kimi tanıyırıq. Vaxtilə gündəmin bir qisim xəbərlərini onun yaradıcılıq işləri təşkil edirdisə, bu gün Elmira xanımın strategiyası başqadır - yalanla gündəmdə qalmaqdan nifrət edirəm, - deyir. Fasilələrlə yenilik edən sənətçi yeni təqvimin ilk günlərində tamaşaçısına maraqlı görüntüləri özündə əks etdirən klip vəd etdi. Bu barədə sənətçi özü danışıb:
"Repertuarıma söz və musiqisi özümə məxsus olan "Yuxusuz gecələr" mahnımı daxil etdim. Xatırladım ki, vaxtilə bu mahnı Kərimin ifasında eşidilib. İfa yaxşı idi, yenidən təzələyib öz repertuarıma daxil etdim. Böyük fasilə yaratmadan mahnının klipini də düşündüm. Hazırda çəkilişlər gedir. Güman edirəm ki, fevralda tamaşaçılar hazır klipi izləyəcəklər".
Elmira xanımın taktikasında tez-tez efirlərə çıxmaq istəyi yoxdur. Bir çox sənətçilərin sevə-sevə dəvətini gözlədiyi bəzi verilişlərdən Elmira xanım imtina etdiyini söylədi.
"Verilişləri mən seçirəm, məni seçmirlər. Yalandan gündəmdə qalmaqdan nifrət edirəm. Bu, mənim ampluam deyil" - deyə sənətçi bildirib.
|
