Reper Hüseyn Dəryanın keçmiş həyat yoldaşı, bir müddət əvvəl özünü həvəskar ifaçı kimi ictimaiyyətə təqdim edən Sona xanımın oxumağı deyil, açıqlamaları marağa səbəb oldu. Əksər şou-proqramlarda həvəskar ifaçının istedadının bir o qədər parlaq olmadığı önə çəkilərək, istedadlılarla müqayisə edildi. Reperin də uşağının anasının sənətinə münasibəti birmənalı olmadı. Onu yalnız evdar qadın kimi görmək istəyən Hüseyn Dəryanın arzuları çin oldu. Sona xanım qısa zamanda qərarını verdi - oxumaqdan, mahnı həvəsindən vaz keçdi. Onu əlində mikrofon səhnədə oxuyan görməyəcəyik. Bu barədə özü danışıb:
"Hüseynin həyat yoldaşı kimi insanların arasında çoxlu hörmətim oldu. Amma çoxları eşidəndə ki, mahnı oxuyuram, etiraz edib, fikrimdən daşınmağı məsləhət gördülər. Mən həmin hörməti itirməmək üçün bu addımı atdım. Qərarımı verməkdə əsas məqsədim bir də anam oldu".
Sona xanım deyir ki, anası onun qarşısında şərt qoyub - "ya səhnə, ya mən". İkinci ilə razılaşan Sona xanım belə deyir:
"Əslində, mənim və övladımın dolanışığını əsas anam təmin edir. Atam Moskvada yaşayır və işləyir. Qazancını göndərir və anam mənimlə bölüşür. Mən onun övladı olaraq mövqeyinə hörmətlə yanaşdım. Bir də doğmalarımın himayəsini hər şeydən üstün bildim. Bu səbəbdən də müğənni olmaqdan imtina etdim. Anam əlini üstümüzdən çəksə, mən, demək olar - sıfıram".
Sona xanımdan soruşanda: "Məgər Hüseyn bəy övladına maddi dəstək göstərmir?" - belə cavab verdi:
"Əslində olur. Amma bu, dolanışığımız üçün kifayət deyil. Axı Hüseyn özü yaxşı pul qazanmır ki, bizi də yaxşı təmin eləsin. Ayda bəzən 2-3 dəfə uşaqla görüşür. Bunların birində uşağın cibinə pul qoyur ki, özünə kontur və yə nə isə alsın. Pulu olanda, mütləq övladı ilə bölüşür. Az olduğundan mənim də tələbim böyük deyil".
|
