Bir müddət əvvəl Türkiyə səfərinə hazırlaşan Arzum məqsədi barədə heç bir açıqlama vermək qərarında idi. Səfərini başa vuran sənətçi uğurlu keçən yaradıcılıq işi barədə AYNAya danışdı:

"Qeyd edim ki, gedərkən bunu istirahətlə bağlamağa çalışdım ki, boş vədlər danışmayım. Maraqlı bir layihədə iştirak etdim və bu barədə informasiyanı bölüşmək istəyirəm. Səfər müddətində özümü fərqli ampluada sınamışam. Bu, yaradıcılığımda bir ilk idi".

Bir müddət öncə gələn təklifi dəyərləndirən Arzum orda filmə çəkilib. Bildirək ki, film Türkiyənin kino sektorunda uğurlu işlərə imza atmış prodakşn tərəfindən ekranlaşdırılır. Müqavilənin şərtlərinə əsasən, ifaçı film barədə ətraflı danışa bilməz. Buna görə də filmin adını sirr saxlayan ifaçı sadəcə olaraq rolu barəsində məlumat verməklə kifayətləndi. Əsilzadə ailənin şıltaq qızı obrazını canlandıran sənətçi filmin çəkilişlərinin davam etdiyini bildirdi:

"Filmin çəkilişlərinin əsas hissəsi çəkilib. Sadəcə olaraq hava şəraiti ilə əlaqədar olaraq mövsümün dəyişməsini gözləyirik. Çünki filmin digər hissəsində hadisələr dəniz kənarında, istirahət məkanında cərəyan edir".

Filmin təqdimatına gəlincə, Arzum bildirdi ki, ilin sonunadək ekran işinin montajı yekunlaşacaq və çox güman ki, premyerası reallaşacaq. "Sözsüz ki, film ilk olaraq Türkiyədə yayımlanacaq. Azərbaycanda təqdim olunması bizim təşkilatçılardan asılıdır. Əgər şirkətlə razılıq əldə olunsa, vətənimizdə də nümayiş oluna bilər", - deyə Arzum qeyd edib.