"Gec olsun, güc olsun" prinsipi ilə çalışan Abbas Bağırov yeni klip çəkdirib. Sözləri və musiqisi Anar Məmmədova aid olan "Aləm gözəl" adlı mahnısına ekran həyatı vermək üçün Nail Naiboğluna müraciət edib.

İki gün davam edən çəkilişlər həm pavilyonda, həm də şəhərin müxtəlif məkanlarında aparılıb. Öyrəndik ki, çəkilişlər üçün Türkiyədən xüsusi olaraq avadanlıq gətirilib.

Yaxın günlərdə seyrçilərə təqdim olunacaq "Aləm gözəl"in nümayişi paralel olaraq Türkiyənin yerli telekanallarından birində də olacaq.

Yeri gəlmişkən, Ramal İsrafilov və Abbas Bağırov arasında narazılıq yenidən baş qaldırıb. Bu dəfə Ramal eks üzvü olduğu "A trio" qrupunun rəhbəri Abbas Bağırova qarşı mahnı iddiası ilə çıxış edib. Belə ki, Abbas Ramalın bəstələdiyi "Xoşbəxt sevgi" adlı mahnısını "Aləm gözəl" adı ilə ondan icazəsiz olaraq öz repertuarına daxil edib və bu azmış kimi müəllifin adını da dəyişib:

"Oxuyur? Canı sağ olsun. Heç olmasa müəllif olaraq öz adımı çəksin. "Aləm gözəl" mahnısını mən Anar Məmmədovun tədbirində ev yiyəsinə hədiyyə olaraq oxumuşam və bunun müəllifi özüməm. Abbas isə bu mahnını dübarə oxuyaraq müəllif kimi Anar Məmmədovu göstərir", - deyə Ramal İsrafilov narazılığını etdi.

Bəstəkar-müğənni hüquqlarını tələb edəcəyini də bildirdi:

"Bu mahnım da başqa mahnılarım kimi Müəllif Hüquqları Agentliyində mənim adımla qeydiyyatdan keçib. Bu, mənim halal zəhmətimdir. Zəhmət olmasa, oxuyan hər kəs bunu nəzərə alsın".

Məsələyə geniş mövqe bildirməyən Abbas isə Ramalın iddiasının əsassız olduğunu bildirdi və şərh vermək istəmədi. Dedi ki, zamanında hər şey olduğu kimi görünəcək.