Nəqliyyatı intellektual idarəetmə məsələsi xeyli vaxtdır diqqətdədir. Bu gün ictimai nəqliyyatda o qədər problemlər yaşanır ki, hamı gözünü bu sistemə dikib. Paytaxtın avtobus dayanacaqlarının çoxunda intellektual idarəetmə monitorları quraşdırılıb. Şəhərin mərkəzi səmtlərində quraşdırılan monitorların əksəriyyəti artıq istifadəyə verilib. Bunun üstünlükləri kimi deyə bilərik ki, dayanacaqda vətəndaş hansı avtobusun neçə dəqiqədən sonra gələcəyini monitordan görə bilir. Nəqliyyat Nazirliyi mətbuat xidmətinin rəhbəri Namiq Həsənov qeyd edir ki, monitorların başa düşülməsi çox asandır, nə etmək lazım olduğu ekranda Azərbaycan dilində göstərilib, xarici vətəndaşlar üçün ingilis dili də yerləşdirilib.
Monitorlarla bağlı bir neçə dayanacaqda olduq, əksəriyyətinin ekranında yazılıb ki, "tamamlama işləri gedir". Bizim redaksiya ilə üzbəüzdəki dayanacaqda quraşdırılan isə işə salınmadı - həmin gecə ona maşın çırpılmış, hər şey çiliklənib yerə tökülmüşdü. Sonra dirəklərin əyri-üyrüsünü düzəltdilər. Təzə şüşə və monitoru isə hələ də yoxdur. Bu dayanacağın məhzun görkəmi pəncərəmizdən görünür.
Namiq Həsənov deyir ki, bu sistem dünyanın cəmi 8 ölkəsində var. Onların da ən son texnologiyaya əsaslanan və müasiri Azərbaycandadır:
"İntellektual idarəetmə sisteminin mərkəzi binasında 24 metr uzununda, 5 metr hündürlüyündə monitor var. Yəni şəhərdəki bütün ictimai nəqliyyat sistemi hissələrə bölünərək, hamısı o monitorda əks olunur. Bu sistem Bakıda 664 dayanacaqda quraşdırılacaq. Bundan sonra vətəndaşlarımız da fikirləşsinlər ki, bu qədər vəsait məhz onlar üçün yatırılıb. Yəni bu aparatlara qayğı və diqqətlə yanaşsınlar".
|
