Qüvvədə olan "Elektroenergetika haqqında" və "Qaz təchizatı haqqında" qanunlara görə, istehlakçıya yazılı bildiriş göndərilmədən qaz, elektrik və istilik enerjisini kəsmək qəti olmaz. Çox təəssüf ki, bu qanunvericiliyin tələbinə kommunal xidmət orqanlarında yenə də əməl edilmir. Yenə də xəbərdarlıq edilmədən mənzillərə qaz və elektrik verilməsi dayandırılır. Bəzən bir neçə günlüyə harasa getmiş vətəndaş evinə qayıdanda işıq və qazın kəsildiyini görür. Xəbərdarlıq edilmədən kəsilən qaz və elektrikin qəflətən verilməsi isə faciələrə yol aça bilir.

"Bakıelektrikşəbəkə" mətbuat xidmətinin rəhbəri Tanrıverdi Mustafayev hər bir borclu abonentə bildiriş verildiyini qeyd edir:

"Abonentə verilən bildirişin arxasında isə borcu vermədikləri təqdirdə müəyyən tədbirlərin görüləcəyi barədə məlumat yazılır. Abonent bildirişi aldıqdan sonra 10 gün müddətinə borcunu ödəməsə, elektrik enerjisi kəsilir. Biz borclu abonentlərin işığının kəsiləcəyi barədə dəfələrlə xəbərdarlıq edirik. Hətta mətbuat vasitəsilə bu xəbərdarlıqlar yayılır".

"Azəriqaz" SC qaz təsərrüfatı istismarı şöbəsinin müdiri Vaqif Namazov bildirir ki, MM adıçəkilən qanunları təsdiq edəndən sonra abonentə mütləq xəbərdarlıq olunmalıdır. Bundan sonra qazın kəsilməsinə icazə verilir. Təqdim etdiyimiz bildirişdə borcun son ödəmə tarixi göstərilir. Abonent bildirişə məhəl qoymadıqda həmin tarixdə əməkdaşlarımız tərəfindən qaz təchizatı dayandırılır. Bundan başqa, hər hansı bir səbəbdən, hansısa əraziyə təbii qaz verilməsində fasilə yaranacaqsa, dərhal əhaliyə kütləvi informasiya vasitələri ilə xəbərdarlıq edilir. Əvvəlcədən planlaşdırılan təmir-tikinti işləri ilə əlaqədar əhali 5 gün əvvəldən, hansısa qəza baş verərsə, elə həmin gün qazın kəsilməsi barədə xəbərdar edilir". "Azərsu" ASC-dən də bildirildi ki, bu qanun onlara aid olmasa da, suyu yalnız xəbərdarlıq ediləndən sonra kəsirlər. İşçilər hər borclu abonentə bir ay əvvəldən xəbərdarlıq edir. Daha sonra ona su verilməsi dayandırılır.

İqtisadçı Nazim Məmmədov isə hesab edir ki, kimin ki, işığa, suya, qaza borcu var, ona əvvəlcədən xəbərdarlıq edilməlidir.Eyni zamanda darvazadan kənarda quraşdırılan sayğaca görə vətəndaşın məsuliyyət daşıması da yolverilməzdir.