Azərbaycanlı təəssübkeşlərdən doktor Məhərrəm Kamrani və mühəndis Saleh Mollabbasinin həbsinə dair məhkəmə qərar çıxarıb. "Öyrənici"nin məlumatına əsasən, onlar Əhər şəhərindəki yerli inqilab məhkəməsi tərəfindən 6 ay azadlıqdan məhrum ediliblər. Bu azərbaycanlı ziyalılar "siyasi qruplaşmalarda iştirak etməklə islami hakimiyyəti yıxmağa cəhd və sistemin əleyhinə təbliğat aparmaqda" ittiham olunublar.
Məhərrəm Kamrani Şəhriyar adına ocağın mərkəzi şurasının üzvü, "Oyanış" adlı tələbə dərgisinin məsulu və Azərbaycan nəşriyyatı ocağının üzvüdür.
Saleh Mollabbasi də tanınmış tələbə fəallardan olub. Başqa bir ziyalı - Həmidə Fərəczadə Təbrizdəki mərkəzi həbsxanaya köçürülüb. Həmidə xanım ötən il Azərbaycan türklərinin kütləvi həbsi zamanı Urmiya şəhərində tutularaq, ETTELAAT-ın Təbriz təcridxanasında 3 aydan artıq təkadamlıq kamerada saxlanılıb. Bu müddətdə o, fiziki və mənəvi işgəncəyə məruz qalıb, gecə-gündüz sorğu-sual olunub. Həmidə xanım 5 aydan sonra 220 min dollarlıq mülk girovu qarşılığında azad edilmişdi. İnqilab məhkəməsinin Təbriz idarəsinin ikinci şöbəsi "milli təhlükəsizliyi pozmaqda, dövlət quruluşuna qarşı təbliğat aparmaqda" suçlayaraq, onu 6 ay azadlıqdan mərhum etmişdi.
Tutuqlama zamanı 5 ay saxlandığını hesablayaraq 6 aylıq həbs müddətinin bir ayını zindanda keçirəcək. Onu da bildirmək lazımdır ki, Həmidə Fərəczadə ötən il həbs edilməzdən öncə öz iş yerindən, yəni Taleqani adına xəstəxanadan da çıxarılmışdır (Həmidə xanım Tibb Universitetini bitirib).
Ötən həftə eyni məhkəmənin qərarı ilə suçlanan Yunus Süleymani də həbsindən qalan 40 günü Ərdəbil zindanına aparılıb. Bu tələbə də 6 ay müddətinə azadlıqdan məhrum edilib. O da tutulduğu ilk 5 ayı Təbrizdə təkadamlıq kamerada saxlanılıb. Yunus Süleymani təcridxanada işgəncəyə məruz qalıb. Elektroşok nəticəsində bir dəfə infarkt keçirib.
|
