Əslən tacik olan Rəcəb Səfərov Moskvada yaşayır. Bu şəhərdə "Çağdaş İranı araşdırma mərkəzi" qurub və buranın "prezidenti"dir. Bizdə olan bilgiyə görə, bu şəhərdə ölüm-zülüm jurnalistika ixtisası alıb, indi isə İran və Azərbaycan məsələləri üzrə hətta "ekspert"dir. Bu günlərdə Səfərovun bir "şərhi"ni oxuduq və gülməyimizi güclə saxladıq.
"İlk növbədə İran azərbaycanlıları iranlıdır, İslam Respublikası vətəndaşıdır. Azərbaycan Respublikasına birləşməyi onlar qorxunc yuxularında da görmürlər" ("Georhiatimes.info"). Bu, "ekspert"in birinci tezisi. Bir az sonra isə deyir: "İranın şimalında, azlıqda yaşayan azərbaycanlılar separatçı ideyalara yoluxublar. Onlar İran cəmiyyətində özlərinə yer tapmayanlardır".
Ziddiyyəti gördükmü? Əvvəl "yuxuda da görmürlər", sonra isə bəlli olur ki, sən demə, "separatçılığa yoluxublar".
Bu sayaq "araşdırma mərkəzləri"nin nə məqsədlə yarandığı və musiqi havasının parasını kimin verdiyi bizə maraqlı deyil. Amma bu "ekspert"in fars şovinist təbliğatının, erməni təbliğatının gözümüzü döyənək etmiş tezisləri ilə danışdığı diqqətimizi çəkdi. Bu "ekspert" İranın şimalında Azərbaycan türklərini azlıq bilir, yəqin bilmir ki, türklər ölkə əhalisinin azı 25 faizini təşkil edir, onlardan sonrakı yerdə 22 faizlə farslar gəlir.
"Prezident"in diqqətinə çatdırmaq istərdik ki, Güney Azərbaycan türkləri çoxluqdur və bu, dünyada ən təzadlı haldır ki, çoxluğun milli haqqı təmin olunmayıb. İran türkləri bu ölkə çərçivəsində öz milli-mədəni haqlarının təmin olunmasını istəyirlər. Türklərin İrandan ayrılaraq öz dövlətini qurmaq istəyənlər də var və bu cərəyan da kifayət qədər nüfuzludur.
"Azərbaycanşünas" və "iranşünas" bu tacik "ekspert"in yeni bir "kəşfi"ni də oxuduq: "Nə Cənubi, nə də Şimali Azərbaycan var. İranın tarixi "Şimal əyaləti" var. Bu bölgənin sakinləri ənənəvi olaraq, İran dövləti və İran mədəniyyətinə bağlı olublar. Separatçılıq ruhu xaricdən gəlir. Normal insan buna aldanmaz".
İran, Güney Azərbaycan haqqında öz "dərin biliyini" nümayiş etdirən tacik "mütəxəssis" demə, Azərbaycan tarixindən də xəbərdar imiş: "Azərbaycan sözü fars mənşəlidir. Antik dövrdə bu ərazi, Arazdan şimal "Alban", yaxud ermənicə "Alvank" adlanıb. İran tarixçiləri oranı "Aran" adlandırır. 1912-ci ilin rus ensiklopediyasında Azərbaycan belə təyin olunub: İranın şimalında varlı sənaye əyaləti, İran Kürdüstanı, Türkiyə, Əcəm və Rusiyanın Cənub Qafqaz bölgələri ilə həmsərhəddir. O, Araz çayı ilə məhdudlanıb".
Səfərova görə, demə, tarix 1912-ci ildən başlanırmış. Bu "ensiklopediya"da isə yazılanlar təkzibolunmaz şeylərmiş. "Prezident" hətta əyləncəli bir elm sahəsi sayılan etimologiyaya da marağı varmış. "Azərbaycan" sözü demə, fars mənşəli imiş.
|
