Ötən ilin sonunda yenidənqurmadan sonra istifadəyə verilən "Nizami" Kino Mərkəzinə hələlik arzu olunan qədər tamaşaçı gəlmir. APA-nın əməkdaşı yeni istifadəyə verilən kinoteatrda tamaşaçı auditoriyası ilə maraqlanıb. Bəlli olub ki, Kino Mərkəzinin 500 nəfərlik tamaşaçı zalında çox az, bəzən hətta 3-4 nəfər filmə baxır.
Hazırda ən çox tamaşaçı sayına istirahət - şənbə və bazar günlərində təsadüf olunur. Həmin günlər 10 nəfərə yaxın tamaşaçı filmə baxmağa gəlir. Kinoteatrlarda adət etdiyimiz popkorn satışına Kino Mərkəzində yol verilmir. Mərkəzdə bu kimi məhsullar satılsa da, popkorn satılmır.
Kino Mərkəzinin direktor müavini İlham Babayev bildirib ki, tamaşaçıların bu məkana cəlb olunması üçün zamana ehtiyac var:
"Bizim Kino Mərkəzi hələlik yeni istifadəyə verilib. Ürəyimiz istəyən qədər tamaşaçının gəlməsi üçün hələlik gözləmək lazımdır. Ümid edirik ki, yanvarın sonunda artıq tamaşaçıların sayında artım hiss olunacaq".
"Nizami" Kino Mərkəzində biletlər 4, 6 və 7 manata satılır.
|
