"Yeni Müsavat" qəzetinin "Nasosnı" aeroportunda iki F-16 təyyarəsi olduğu haqda məlumatı həqiqətə uyğun deyil, bu barədə "Turan"a məlumatlı hərbi mənbə bu qəzetin məqaləsini şərh edərkən bildirib. F-16 Amerika istehsalı olan təyyarədir, bu ölkə isə Azərbaycana bu növ texnika satmır, - deyə mənbə qeyd edib.
Bu təyyarələrin "qonaq" qismində, yəni ABŞ və ya Türkiyə HHQ-nin xoşməramlı səfəri şəklində peyda olması haqqında suala cavabda mənbə bunun kiçik ehtimal olduğunu bildirib.
"İlk növbədə bu növ 2-3 təyyarənin gəlməsinin hərbi cəhətdən heç bir əhəmiyyəti yoxdur. Bu, kəşfiyyatçı təyyarələr olsaydı, onların kəşfiyyatla məşğul olacağını ehtimal etmək olardı. Amerikalılar niyə başqa ölkəyə iki qırıcı göndərsin? Bu, mənasızdır. Bundan başqa, hərbi texnikanın ölkələrin sərhədindən uçması qonşu ölkələrin RƏM sistemləri tərəfindən görülməyə bilməz, onlara beynəlxalq konvensiya və müqavilələrin pozulması ilə əlaqədar izahat vermək lazımdır.
Çox güman ki, jurnalistlər MİQ-29-u F-16-ya bənzədiblər. Hərbi sahədə mütəxəssis, əlbəttə ki, onları qarışdırmaz, jurnalistlər isə belə bir səhvə yol verə bilərdilər. Buna görə əvvəlcə şəkillərə baxmaq, sonra məlumat yazmaq lazım idi", - deyə mənbə tövsiyə verib. Müdafiə Nazirliyinin mətbuat xidmətindən bu məsələ ilə bağlı rəsmi şərh almaq mümkün olmayıb.
|
