İran özünün nüvə proqramı ilə bağlı "altılıq"la (Rusiya, Çin, ABŞ, Fransa, Böyük Britaniya və Almaniya) "ciddi danışıqlar"ın bərpa olunmasına hazırdır. APA-nın məlumatına görə, İran parlamentinin spikeri Əli Laricani belə bir bəyanatla çıxış edib.
"İran həmişə özünün nüvə proqramı ilə əlaqədar "altılıq"la danışıqlara hazır olub. Bu danışıqlar yalnız ciddi olduqları halda uğurla nəticələnə bilər", - deyə Laricani bildirib.
"Bizim türk dostlarımız danışıqların Türkiyədə keçirilməsini təklif ediblər və biz də razılaşmışıq", - deyə Laricani əlavə edib.
Amma İranın nüvə proqramı üzərində qalmaqallar da davam edir və İranlı digər rəsmilər Laricanini təkzib edirlər.
"İranın nüvə obyektlərini təftiş edən Atom Enerjisi üzrə Beynəlxalq Agentliyin müfəttişləri arasında İsrail casusları var və onlar qətlə yetirilən iranlı alimlərin adlarını terrorçu qruplara veriblər". İranın "Mehr" xəbər agentliyinin məlumatına görə, bunu İran parlamentinin Milli təhlükəsizlik və xarici siyasət komissiyasının üzvü Məhəmməd Kərəmi Rəd deyib.
Komissiyanın digər üzvü Qulamrza Kərəmi isə beynəlxalq agentliklə əməkdaşlığın narahatlıq doğurduğunu bildirib: "Son sui-qəsdin Məsud Əliməhəmmədinin qətlə yetirilməsinin ildönümündə təşkil edilməsi diqqəti cəlb edir. Bu hadisə ABŞ və müttəfiqlərinin İranın inkişafını əngəlləməyə istiqamətlənmiş planlı bir hərəkətdir".
Qulamrza Kərəmi də beynəlxalq agentliyin İranın tanınmış nüvə alimlərinin adlarını ABŞ və İsrailə təqdim etmiş ola biləcəyini söyləyib.
|
