"Avropa Birliyi və başqa ölkələrdə demokratiyanın inkişafı absurd həddə çatıb, Fransa parlamentinin qəbul etdiyi qanun layihəsi də absurddur". "Çoxmillətli dövlət olan Rusiya Federasiyasında "erməni soyqırımı"nı inkar edənlərin cinayət məsuliyyətinə cəlb olunması haqqında qanunun qəbulunu təklif etmək təxribatdır və bu, prinsipcə dövlətin mövcudluğunu sarsıda bilər".
Bu fikirləri Rusiya Dövlət Dumasının MDB məsələləri üzrə komitəsinin sədri, deputat Aleksey Ostrovski deyib. Onun sözlərinə görə, Avropa Birliyi və planetin başqa ölkələrində demokratiyanın inkişafının səviyyəsi absurd həddə çatıb: "Artıq həmin ölkələr bundan əziyyət çəkirlər. Fransa parlamentinin qəbul etdiyi qanun layihəsi də absurddur".
Aleksey Ostrovski Rusiyanın cənubunda, Krasnodar vilayətində və o cümlədən Rusiyanın digər regionlarında ermənilərin yaşadığını qeyd edərək deyib:
"Eyni ilə Fransada, ABŞ-da da ermənilər yaşayır. Lakin bu o demək deyil ki, bütün Rusiya cəmiyyəti bu ideyanı qəbul etməlidir. Hesab edirəm ki, bu qanunun qəbul olunması demokratik və sivil vətəndaş cəmiyyəti normalarını aşmaq deməkdir".
Millət vəkili xalqın seçiminə görə bu məsələni qaldırmağın düzgün və konkret olmadığını söyləyib:
"Bizim üçün bütün millətlər və xalqlar eynidir. Biz hamı ilə qardaşlıq və dostluq münasibətləri saxlayırıq. Məncə, bu məsələni qaldırmaqla aranı qarışdırmağın və "Pandora" qutusunu açmağın heç bir mənası yoxdur, hansı ki, bu qutunu bağlamaq daha sonra çox çətin olacaq".
Qeyd edək ki, bir müddət öncə Rusiyanın Soçi şəhərində fəaliyyət göstərən "Soçi Ermənilər Birliyi" adlı diaspor təşkilatı Fransa parlamentində qəbul edilən qondarma "erməni soyqırımı"nı inkar edənlərin cinayət məsuliyyəti daşıması haqqında qanunun eynisinin Rusiya Dövlət Dumasında qəbul edilməsi üçün fəaliyyətə başlayıb. Təşkilatın sədri Valeri Torosyan yaxın günlərdə toplanan imzaların Rusiya Dövlət Dumasının spikeri Sergey Narışkinə, hakim Vahid Rusiya Partiyasına və müxalifətdən olan millət vəkillərinə göndəriləcəyini bildirib.
|
