Avtomobili ən çox vurulan sənətçilərdən olan İlahə İbadova bir neçə həftə öncə eyni situasiya ilə qarşılaşıb. Qəzetimizə deyir ki, sürücü kimi peşəkardır, lakin avtomobilini düzgün idarə edə bilməyənlər onu tez-tez xərcə salırlar:
"Ötən il avtomobilimi neçə dəfə təmirə vermişəm. Çox zaman günah məndə olmur. Avtomobil dayandığı yerdə yoldan keçənin biri naşılığı üzündən onu vurub. Sənətçi olduğuma görə dil-ağız edirlər ki, xərcin azını ödəsinlər. Mən də üzüyumşaq. Təmirin bir hissəsini, elə vaxt da olub ki, hamısını özüm ödəmişəm. Sonuncu dəfəki qəza daha pis olmuşdu. Bir aydan çox avtomobili idarə edə bilmədim. Taksi xidmətindən istifadə edirdim. Dostlarımdan biri vəziyyəti görüb, öz avtomobilini mənə verdi ki, müvəqqəti idarə edim".
Sənətçi ümid edir ki, qəzalar geridə qoyduğumuz köhnə təqvimdə qalacaq. O, dəfələrlə təmir olunan avtomobilini hələlik dəyişmək fikrində deyil. Çünki ona külli miqdarda pul xərcləyib.
|
