Arzum: \"Sponsorlar da kateqoriyalara bölünür\"

Arzum haqqında son vaxtlar az yazılara rast gəlirik. Onun yaradıcılığında sükut dalğası hiss olunur. Hər zaman temperamentli görünən sənətçi durğunluğun səbəbindən belə danışdı:

"Albom hazırlayıram. Bura son iki ildə yazılan mahnılarım daxildir. Bir yeni işim də ondan ibarətdir ki, "Yana-yana kül oldüm" adlı xalq mahnısının musiqi çarxını artıq ekranlara təhvil verdim. İşlərim bundan ibarətdir".

Gənc ifaçı repertuarını da təzələmək istəyir. Amma onun ifa üslubunu nəzərə alsaq, bu sayaq bəstələrin çox yazılmadığını deyə bilərik. Bir zamanlar "Blyütuz" mahnısı ilə şou-biznesdə ritmini artırsa da, indiki sənət həyatı lirikaya köklənib. Onun ifa üslubuna uyğun mahnıların az yazıldığını dedi:

"Səs imkanlarım genişdir. Səsimi istənilən üsluba kökləyə bilərəm. Lap özümü görmədiyim arabesk üslubunda da oxuya və insanları romantikaya apara bilərəm. Amma oxumuram. İstəmirəm desinlər ki, filan mahnını oxuyan kəs Gülçataydı, kimdi? Çünki dediyim kimi, mənim üslubum deyil. Meylim daha çox dinamik, müasir estrada mahnılarınadır. Amma mənim üslubumda yazılan mahnılar da çox deyil.

REKLAM

Mən özümü öz tərzimdə uyğun mahnılarda tapmaq istəyirəm".

Mahnı mövzusunda belə bir məsələyə də toxunur. Deyir ki, əksəriyyət mahnıları toy bazarının ritminə uyğun seçir. Bu da əksər hallarda sənətçini üslubundan kənarlaşdırır. Deyir:

"Konsertlərdən qazanc olmadığına görə sənətçilər bu imkanı toy bazarında əldə edirlər. Mahnıları da ilk növbədə ona görə seçirlər ki, toy atmosferində olsun. Artıq bunu sənətçi deyil, daxilində olduğumuz şou-biznes tələb edir".

Arzumla aktuallığını itirməyən "sponsor" anlayışından danışdıq. Son belə bir söhbət bu günlərdə ATV-nin "Gün keçir" verilişində xalq artisti Flora Kərimova və duet dostu Rövşən Çivişov tərəfindən aparılıb. Arzum isə deyir ki, hələ də "sponsor" sözünün həqiqi mənasını dərk edə bilmir:

"Ona görə ki, bu ifadə fərqli yozulur. Çaşıb qalmışam, bəziləri deyir ki, sponsor maddi dəstək göstərəndir. Amma belə olanda çoxlu söhbətlər yaranır. Artıq sponsorlar da kateqoriyalara bölünür - A, B, C-si var. Amma mən hər zaman öz pul kisəmdən xərcləmişəm. Ona görə də, bu kateqoriyalar mənə yaddır. Mənim anlamımda bir sponsor anlayışı var - hər hansı şirkət sənətçinin məşhurlaşması üçün pul xərcləyir və niyyəti hasil olanda qazancın yarısını özünə götürür".

Sonda Arzum bir arzusunu dilə gətirdi. Bu il Azərbaycan Milli Konservatoriyasının məzunu olacaq və magistr pilləsini də bitirmək niyyətindədir. Doğrudur, yaradıcılıq işləri buna mane olur. Amma gec-tez magistr adını daşıyacağına əmindir.