Azərbaycan əhalinin 1992-ci il yanvarın 1-dək Əmanət Bankına qoyulmuş əmanətlərinin qaytarılmasının təmini üzrə mexanizm hazırlayıb. MM İqtisadi siyasət komitəsi əmanətlərin qaytarılmasının təmin edilməsi, qaytarılma mexanizmi üzrə qanun layihəsi, qanun layihəsinin ayrı-ayrı bəndləri üzrə izahedici qeydlər, eləcə də əmanətlərin qaytarılmasının təmini üçün qüvvədə olan qanunvericiliyə hansı dəyişikliklərin tətbiq edilməsinin vacibliyi ilə bağlı qanun layihəsini artıq Nazirlər Kabineti və Maliyyə Nazirliyinə göndərib.
Maliyyə naziri Samir Şərifov bu ərəfədə bildirmişdi ki, 1992-ci il yanvarın 1-dək Azərbaycan SSR Əmanət Bankına qoyulan əmanətlərin qaytarılmasının təmin edilməsinə 2012-ci ildə maliyyə vəsaiti tapa bilər. Nazirin sözlərinə görə, bu, müvafiq qanun layihəsinin hazırlanmasından sonra mümkün olacaq.
Bu vəsaitlərin verilməsi əhalinin əmanətlərinin indeksləşdirilməsi prosesinin çətinliyinə görə bir neçə dəfə təxirə salınıb. Bu prosesin hazırlanması üçün parlamentdə işçi qrupu yaradılıb. Bu proses "Əhalinin 1992-ci il yanvarın 1-dək AzSSR-in Əmanət Bankında həyata keçirilən əmanətlərinin indeksləşdirilməsi haqqında" qanunun mexanizminin hazırlanması və təsdiqindən sonra başlaya bilər.
İndeksləşdirmə məsələsi parlamentdə bir neçə dəfə qaldırılıb, lakin Baş nazir Artur Rasizadənin rəhbərliyi altında 2005-ci ildə yaradılan dövlət komissiyasının qərarı olmadan əmanətlərin qaytarılmasına start verilə bilməz, bunun üçün ölkəyə uyğun əmsal müəyyənləşdirilməlidir. Büdcədən mövcud mexanizmlər olmadan bu məqsədlərə vəsait ayrıla bilməz, halbuki 2006-cı ilin dövlət büdcəsində əmanətlərin indeksləşdirilmə prosesinin başlanması üçün 50 milyon manat qoyulmuşdu.
Qanun layihəsinin əvvəlki variantına əsasən, əmanətlərin indeksləşdirilməsinin 8-10 il ərzində həyata keçirilməsi nəzərdə tutulurdu və alətlərdən biri kimi qiymətli kağızlar göstərilirdi.
Şərifovun sözlərinə görə, qonşu ölkələrin təcrübəsi əmanətlərin bu cür indeksləşdirilməsinin səmərəsiz olduğunu göstərdi, belə ki, bu, pulların qiymətdən düşməsinə gətirib çıxarır. Spiker Oqtay Əsədov nazirin mövcud məsələnin qısa müddətdə (1-2 il) həlli ilə bağlı təklifini dəstəkləyib.
|
