Azərbaycan əsilli insanların sıx yaşadığı Qars şəhərində Azərbaycan milli musiqi alətlərinin hazırlandığı emalatxana fəaliyyətə başlayıb. Türk mətbuatının yazdığına görə, emalatxana BMT, YUNESKO və Türkiyə Mədəniyyət Nazirliyinin dəstəyi ilə yaradılıb.
Emalatxanaya rəhbərlik edən Salih Şahin milli musiqi alətlərinin hazırlanmasını atasından öyrəndiyini və getdikcə unudulan bu sənətin yenidən canlandırılması təşəbbüsünün vaxtında irəli sürüldüyünü deyib:
"Buradakı emalatxanada saz, tar və Azərbaycan musiqisində əvəzedilməz yeri olan kamança düzəldirik. Türkiyədə tar hazırlanmasında sıxıntılar olsa da, biz burada tut ağacından oyma üsulla tar da hazırlayırıq.
Məqsədim unudulmaqda olan və Azərbaycan musiqisində önəmli yeri olan milli alətlərin hazırlanmasını gənclərə öyrətməkdir. Əks halda, bu sənət tam sıradan çıxar".
|
