Yanvar ayının 12-də Budapeştdə Azərbaycanın Dağlıq Qarabağ bölgəsindən olan məcburi köçkün uşaqların çəkdikləri fotoşəkillərdən ibarət sərgi keçirilmişdir. Bu sərgi Macar Könüllülər Fondu tərəfindən 4 ölkədən 8 könüllünün iştirakı ilə həyata keçirilən layihənin yekunu olmuşdur, deyə bizim səfirlikdən xəbər verilir.
Macarıstan, Fransa, Hollandiya və Polşadan olan könüllülər Azərbaycana gələrək qaçqın düşərgələrində məskunlaşan uşaqlara fotoaparatlar paylamış və şəkillərin çəkilməsini, həmçinin onların "Sənin arzun nədir?" mövzusunda inşa yazmasını təşkil etmişdir. Bu inşalar sərgidə Azərbaycan, ingilis və macar dillərində nümayiş etdirilmişdir. SOS uşaq kəndlərinin dəstəyi ilə həyata keçirilən layihənin əsas məqsədi azərbaycanlı qaçqın və məcburi köçkünlərin həyatı və istəklərinə uşaqların gözü ilə baxılması olmuşdur.
Sərginin açılışında çıxış edən, layihənin Macarıstanlı könüllüləri Annamaria Daroczi və Gabor Jeszenoi Azərbaycan haqqında, qaçqın düşərgələrində uşaqlar haqqında təəssüratlarını bölüşmüşlər. Tədbirdə həmçinin məcburi köçkün ailəsindən olan 11 yaşlı Elgünün vətənpərvərlik mövzusunda yazdığı inşa macar dilində iştirakçılar üçün oxunmuşdur.
|
