Nemət Pənahlının səhhəti pisdir. Bu barədə onun həyat yoldaşı Həcər Pənahlı "Media forum" saytına açıqlamasında deyir: "Ötən il 17 noyabr Milli Dirçəliş Günü ilə əlaqədar olaraq ANS telekanalı bizim ailəni efirə dəvət etmişdi. Dərdimiz çox olsa da, mən fürsətdən istifadə edib yalnız Nemətin sağlıq durumundan danışdım. Nemət yüksək şəkərdən, böyrək xəstəliyindən əziyyət çəkir. Çəkiliş efirə gedəndən sonra ümid edirdim ki, heç olmasa onun səhhəti ilə maraqlanarlar. Amma əksinə oldu, Neməti sağlıq durumuna tamamilə ziyanlı ciddi rejimli cəzaçəkmə müəssisəsinə göndərdilər. Nemətin həbsxana yolları onun ciyərlərində ciddi iz qoyub. Ona görə də yoldaşım bu problemlə bağlı daim həkim nəzarətində olub, daima müalicə alıb. İndi təsəvvür edin ki, bu adamı 200 nəfərin saxlandığı qapalı yerə salıblar. Artıq kimə şikayət edəcəyimizi bilmirik. Bu ölkənin aidiyyəti orqanlarını bizim şikayətlərimiz qətiyyən maraqlandırmır.
Nemət Bakı İstintaq Təcridxanasında qanuna tamamilə zidd olaraq 7 ay tək saxlanıb ki, bu, konkret cəza növüdür. Vəkilinə isə deyilib ki, guya Nemət özü tək qalmaq üçün ərizə verib. Halbuki Nemət belə bir ərizə yazmayıb. Bütün bu neqativ hallara görə Avropa İnsan Hüquqları Məhkəməsinə müraciətlər göndərilib. Bilirik ki, şikayətlərimizə məhəl qoymayan dövlət səlahiyyətliləri Avropaya şikayətlərimizə dövlətin imicinə xələl gətirmək qiyməti verəcəklər. Amma bu ölkədə öz dövləti tərəfindən insan yerinə qoyulan hansı vətəndaş Avropaya üz tutar? Ailəsi olaraq Nemət Pənahlını ölümün cəngində qoya bilmərik ki.
Doğrudur, Bakı İstintaq Təcridxanasından fərqli olaraq, həbsxana rəhbərliyi ilə aralarında heç bir problem yoxdur. Yəni ona qarşı qeyri-qanuni təzyiqlər olmur. Amma bir daha qeyd edirəm, onun səhhəti qapalı cəzaçəkmə şəraitinə tab gətirməyə bilər".
|
