Ötən ilin sonlarında dələduzluqda və sənədləri saxtalaşdırmaqda ittiham olunaraq həbs edilən Nehrəm sakini ilə bağlı Muxtar Respublika prokuruorluğu və ombudsmanı bəyanatla çıxış edib. Bu iki qurum bəyan edir ki, Bağırzadə dələduzdur, o, düzgün olaraq həbs edilib və saxlanma şəraiti ilə bağlı şikayəti yoxdur.
Lakin iş burasındadır ki, hər dəfə qanunsuz həbs və hətta saxlanan şəxsin ölümü baş verdiyi halda belə, Naxçıvandan bu cür bəyanatlar səslənir. Məsələn bu, Naxçıvan MTN divarları daxilində vəfat etmiş Turac Zeynalovla da baş vermişdi. Naxçıvan hakimiyyəti ictimaiyyəti inandırmağa çalışır ki, həbs olunmuş Zeynal Bağırzadənin işi ilə bağlı qeyri-adi heç nə baş vermir. Buna əsas kimi onun öz hərbi sənədlərini saxtalaşdırması və uzun illər Çernobıl faciəsinin veteranı kimi qanunsuz pensiya alması göstərilib.
Lakin qeyd etmək lazımdır ki, hakimiyyətin Bağırzadənin dələduzluğunu "yadına salmasına" səbəb onun qardaşı Yaşarın Nehrəm kəndini sudan məhrum edən yerli məmurların özbaşınalığına etiraz etməsi olub. Bundan sonra qardaşlara həm psixoloji, həm də fiziki təzyiqlər nəticə verməyib və onlar öz tələblərindən geri çəkilməyiblər. Zeynal saxlanılaraq amansızcasına döyülüb. O, ağır vəziyyətdə xəstəxanaya aparılıb, yaxınları ilə görüşünə imkan verilməyib. Ailə bildirir ki, o, özünə qarşı irəli sürülən ittihamları etiraf etməkdən imtina etdiyinə görə işgəncələrə məruz qalıb.
Ötən gün Naxçıvandan daha bir xəbər gəlib ki, Z.Bağırzadə özünü yaxşı hiss edir. Bu dəfə Demokratiya və İnsan Hüquqlarını Müdafiə Mərkəzi adlı hüquq müdafiə təşkilatı belə məlumat yayıb. QHT bildirib ki, İşgəncələr Əleyhinə Komitənin yerli nümayəndəsi ilə Bağırzadəyə baş çəkiblər və o, özünü yaxşı hiss edir, heç bir şikayəti yoxdur.
Demokratiya və QHT-nin İnkişaf Resurs Mərkəzinin rəhbəri Məlahət Nəsibova bu məlumatları şərh edərək bildirib ki, uzun müddətdir ki, Bağırzadəyə baş çəkmək üçün Penitensiar Xidmətdən və hakimiyyətdən icazə ala bilmir.
Öz növbəsində İşgəncələr Əleyhinə Komitənin rəhbəri Elçin Behbudov bildirib ki, öz nümayəndəsinin Bağırzadəyə baş çəkməsi üçün göstəriş verməyib və başçəkmənin nəticəsi barədə məlumatı yoxdur. Digər yerli hüquq müdafiəçisi, RATİ-nin Naxçıvandakı nümayəndəsi Elman Abbasov hüquq müdafiəçilərinin həbs olunan şəxsə baş çəkməsi faktından təəccübləndiyini bildirib. "İndiyədək Naxçıvanda onlarla işgəncə, qanunsuz həbs halları baş verib. Lakin heç zaman hüquq müdafiəçiləri onların yanına buraxılmayıb. Bu hüquq müdafiəçiləri kimlərdir ki, onları ora buraxıblar. Biz belə hüquq müdafiəçiləri tanımırıq", - deyə o vurğulayıb.
Bunlar çox qəribə görünür, halbuki Naxçıvanda bu cür hallar əvvəllər də baş verib. Yerli və beynəlxalq ictimaiyyətin insan haqlarının pozulması ilə bağlı tənqidlərinin qarşısını almağa çalışan hakimiyyət, görünür, özünü təmizə çıxarmaq istəyir.
Xatırladaq ki, dekabrın 26-da Naxçıvan şəhər məhkəməsində hakim Mehman Dünyamalıyevin sədrliyi ilə keçirilən məhkəmə prosesində AXCP fəalı Zeynalabdin Bağırzadə haqqında AR CM-in 310 (Vəzifəli şəxsin səlahiyyətlərini mənimsəmə), 320.2 (bilə-bilə saxta sənədlərdən istifadə etmə), 178.3.2 (dələduzluq külli miqdarda ziyan vurmaqla törədildikdə) maddələri ilə 3 ay müddətinə həbs qətimkan tədbiri seçilib. Məhkəmə prosesi NMR baş prokurorunun təqdimatı əsasında keçirilib.
|
