"Dağlıq Qarabağ münaqişəsinin tənzimlənməsində siyasi resurs tükənib, artıq ATƏT Minsk Qrupu vasitəçiliyinin iflası başlayıb". Bu sözləri Siyasi İnnovasiya və Texnologiya Mərkəzinin rəhbəri Mübariz Əhmədoğlu dünənki mətbuat konfransında deyib. Onun sözlərinə görə, "Status-kvo dərhal dəyişilməlidir", "status-kvonun dəyişilməməsi region üçün təhlükəlidir" tezisləri sloqana çevrilib.
Mübariz Əhmədoğlu bildirib ki, Dağlıq Qarabağın erməni və azərbaycanlı icmalarının görüşünə, onların arasında dialoqun reallaşmasına edilən cəhdlər nəticəsiz qalıb. Belə ki, ermənilər bu dialoqa razılıq vermir, ümumiyyətlə, icma bölgüsünü qəbul etmir. Mübariz Əhmədoğlu qeyd edib ki, erməni şüuru Dağlıq Qarabağ münaqişəsinin tənzimlənməsi dedikdə, Dağlıq Qarabağın Azərbaycana qaytarılmasını başa düşür. Ermənistan tərəfi fikirləşir ki, Dağlıq Qarabağın qaz kəmərinə və ya Qəbələ RLS-ə dəyişdirilməsi məsələsi daim gündəlikdədir. Siyasi şərhçi bildirib ki, münaqişənin tənzimi istiqamətində Ermənistanda etirazlar artır. Belə ki, Ermənistan prezidenti Serj Sarqsyan Dağlıq Qarabağ probleminin əsasını qoyduqlarını və ermənilərin SSRİ-ni dağıtdığını etiraf edib. Mixail Qorbaçovun dövründə SSRİ-ni dağıtmış ermənilər Kremldə yenidən "məskunlaşıb" və Rusiya dövlətçiliyinə qarşı həmin mövqedədir.
Mübariz Əhmədoğlunun sözlərinə görə, siyasi arenada nüfuzu zəifləyən ermənilər cənub qonşumuz olan İranın Dağlıq Qarabağ münaqişəsi ilə bağlı tutduğu mövqeni son ümid yeri kimi qəbul edir.
Politoloq 2011-ci ilin əsas hadisələrini şərh edərkən İranla bağlı fikirlər də səsləndirib. O bildirib ki, İran öz daxili gücü ilə bağlı yalançı hədələrlə məşğuldur. Onun sözlərinə görə, rəsmi Tehran yaxşı başa düşür ki, əgər İranın nüvə müharibəsi başlatmaq şansı olsa belə, ilk növbədə bu, onun özünə ziyan edəcək. Mübariz Əhmədoğlu bildirib ki, yola saldığımız ildə müsəlman dünyasında baş verənlər İrana təzyiqi daha da gücləndirib. O qeyd edib ki, Qərb İranla bağlı özünün arzuladığı nəticəyə gəlmək istiqamətində kifayət qədər qətiyyətlidir. Bu yönümdə atılan addımlar kimi ölkədaxili mühüm strateji obyektlərdə partlayışların törədilməsini, İran milli valyutasının sürətlə devilyasiyaya uğramasını, hakimiyyətdaxili ziddiyyətin kəskinləşməsini də göstərmək olar.
Mübariz Əhmədoğlu bildirib ki, İran prezidenti Ali dini lider də daxil olmaqla bütün dindarlara qarşı mübarizədə hətta xarici qüvvələrdən də istifadə etməyə hazırdır. Hazırda İran, demək olar ki, bütün qonşuları ilə münasibətlərini kəskinləşdirib.
|
