Yeni il ərəfəsində nüfuzlu amerikalı senator Con Makkeyn prezident İlham Əliyevə şəxsi məktub göndərərək onu bütün siyasi məhbusları azad etməyə çağırıb. Vaşinqtondakı diplomatik mənbələrdən "Turan"a məlum olub ki, məktubda sonuncu əfv aktı və ədalətsiz olaraq mühakimə edilmiş gənc bloger Cabbar Savalanın azadlığa buraxılması müsbət qiymətləndirilib.
"Mən dinc mitinqlərin təşkilinə görə həbs olunmuş digər 16 siyasi məhbusu, həmçinin qalan vicdan məhbuslarını azad etməyə çağırıram", - deyə məktubda deyilir.
Senator Fərhad və Rafiq Əliyev qardaşlarının indiyədək həbsdə saxlanmasından dərin narahatlığını bildirib. "Halbuki onlar Azərbaycan CM-in 76 və 78-ci maddələrinə müvafiq olaraq (şərti olaraq vaxtından əvvəl azad etmək və səhhəti ilə əlaqədar) azad edilə bilərdi", - deyə senator qeyd edir.
"Bir prezident kimi Əliyev qardaşlarını və digər vicdan məhbuslarını azad etmək iqtidarına maliksiniz. Bu, ədalətli və düzgün qərar olardı, bizim ikitərəfli münasibətlərin möhkəmlənməsinə xidmət edərdi. ABŞ onunla yalnız əməkdaşlıq edən yox, həm də ümumi dəyərləri bölüşən, insan hüquqlarına, öz vətəndaşlarının azadlığına hörmət edən ölkələrlə münasibətləri qiymətləndirir", - deyə məktubda qeyd olunur.
Prezident İlham Əliyev ötən ilin sonunda - dekabrın 26-da 92 məhkumun əfv olunması haqqında sərəncam imzalayıb və 75 məhkum azadlıqdan məhrumetmə cəzasının çəkilməmiş hissəsindən, 1 şəxs şərti cəzadan, 2 nəfər islah işləri cəzasından, 14 şəxs isə cərimə cəzasından azad ediliblər. Azərbaycan prezidenti əmin olduğunu bildirib ki, əfv edilən şəxslər bu humanist aktdan düzgün nəticə çıxararaq Azərbaycan dövlətinin qanunlarına gələcəkdə dönmədən əməl edəcəklər. Bu şəxslər arasında AXCP fəalı Cabbar Savalan da var idi.
|
