Dünən Qarabağ Azadlıq Təşkilatının (QAT) bir qrup üzvü Fransanın Bakı səfirliyi qarşısında aksiya keçirib. "Turan"ın məlumatına görə, aksiya Fransa parlamentinin "erməni soyqırımı"nı inkar etməyə görə cəza qanunu qəbul etməsinə etiraz olaraq keçirilib. Aksiya iştirakçıları Fransa, Fransa-Ermənistan birliyi əleyhinə şüarlar söyləyiblər. Bundan əlavə, Fransa səfirliyi üzərindəki dövlət bayrağının endirilməsi, Fransa səfirliyinin Azərbaycandan çıxarılması, Qarabağ münaqişəsinin tənzimlənməsi üzrə Minsk Qrupu həmsədrlərindən biri kimi geri çağırılması da tələblər sırasında yer alıb.
Səfirlik əməkdaşlarının pəncərələrdən aksiyanı seyr etməsinə iştirakçılar kəskin uğultularla reaksiya veriblər. Aksiya iştirakçıları bu qanuna etiraz olaraq Fransanın bayrağını yandırıblar. Aksiyanın qətnaməsi səfirliyə təqdim olunub. Qətnamədə "erməni soyqırımı"nı inkara görə cəza qanunu "antitürk və antimüsəlman ruhlu sənəd" adlandırılır. Fransa rəhbərliyi bu qanunu qəbul etməklə bütün islam dünyasını Fransaya düşmən etməkdə ittiham olunur.
Qətnamədə Fransanın Minsk Qrupu həmsədrliyindən kənarlaşdırılması, Fransanın Azərbaycan səfirliyinin və Azərbaycanda çalışan Fransa şirkətlərinin fəaliyyətlərinin dayandırılması, Fransa istehsalı olan malların boykot edilməsinə çağırılır.
|
