Prezident İlham Əliyev və xanımı Mehriban Əliyeva Bakı Metropoliteninin yenidən qurulmuş "Koroğlu" (keçmiş "Məşədi Əzizbəyov") stansiyasının, yeraltı piyada keçidinin açılışında iştirak etmiş, yeni salınmış park və burada yaradılmış musiqili od fəvvarə kompleksi ilə tanış olublar. Prezident stansiyanın rəmzi açılışını bildirən lenti kəsib.
Piramida formasında inşa edilmiş yeni yerüstü binada müasir işıqlandırma sistemi quraşdırılıb. Prezident və xanımı xalq qəhrəmanı Koroğlunun burada ucaldılacaq abidəsinin eskiz layihələrinə baxıblar. Dövlət başçısı və xanımı platformada yaradılan şəraitlə tanış olublar. Qeyd edək ki, əvvəlki "inqilabi" qırmızı mərmərlə müqayisədə stansiyanın yeni mərmər üzlüyü daha xoş ovqat yaradır.
Daha sonra prezident və xanımı Heydər Əliyev prospekti və Ziya Bünyadov prospektinin kəsişməsində inşa edilmiş yeraltı piyada keçidi ilə tanış olublar. Dövlət başçısı və xanımı keçidin texniki göstəricilərini əks etdirən stendlərə baxıblar. Nəqliyyat naziri Ziya Məmmədov məlumat verib ki, burada uzunluğu 140 və 65 metr olmaqla iki tunel istifadəyə verilib. Hər iki tunelin eni 6 metrdir. Tunellərdə müşahidə kameraları və metro stansiyasına girişi göstərən elektron istiqamətləndirici lövhələr quraşdırılıb.
Dövlət başçısı və xanımı daha sonra Bakının Nizami rayonunda salınmış parkın ərazisi və burada quraşdırılmış musiqili od fəvvarə kompleksi ilə tanış olublar. Paytaxt İH başçısı Hacıbala Abutalıbov məlumat verib ki, parkın ərazisində 12 min kvadratmetr sahədə yaşıllıq salınıb, Hollandiya və İtaliyadan gətirilmiş gül və bəzək kolları əkilib. Burada müasir işıqlandırma sistemi və oturacaqlar quraşdırılıb. Parkın ərazisində inşa olunmuş musiqili od fəvvarə kompleksinin struktur hissəsinin konstruksiyası 60 kilometr/saniyə gücündə küləyə və 9 ballıq zəlzələyə davamlıdır.
Alov simvolu cilalanmış paslanmayan metaldan və kristaldan ibarətdir. Kompleksin tikintisində ABŞ, İngiltərə və İtaliya şirkətləri iştirak etmişlər.
|
