Ziyalılar Forumu srağagün "Hyatt Recensy" otelində onlara forumun keçirməsinə imkan verilmədiyini hökumətin alternativ fikrə qarşı primitiv üsulla mübarizə aparması kimi qiymətləndiriblər ("Turan"). Bu barədə dünən Ziyalılar Forumu Helsinki Vətəndaş Assambleyasının Azərbaycan Milli Komitəsi ofisində mətbuat konfransında bildirilib.

"Ziyalılar Forumuna tədbir keçirməyə imkan verilməməsi uşaq ərköyünlüyüdür. Biz siyasi partiya deyilik. Ziyalılar ölkədə və beynəlxalq aləmdə Azərbaycana mənfi imic gətirən məsələlərə münasibət bildirir. Dünənki tədbirimizdə isə gənclərin problemlərindən danışacaqdıq. Bizim xoşməramlı tədbirimizə qeyri-sivil yanaşma təəccüb doğurur. Elə dairələr var ki, qulaqlarını tənqidə qapamaq istəyir", - deyə forumun üzvü, professor Cəmil Həsənli qeyd edib.

Srağagün "Hyatt Recensy" otelində Ziyalılar Forumunun tədbirinin keçirilməsinə icazə verilməyib. Otelin rəhbərliyi bunun zaldakı texniki problemlərlə bağlı olduğunu bəyan edib. "Bu gün (dünən-red.) otelin rəhbərliyinə bildirmişik ki, Ziyalılar Forumu tədbirini zalda texniki problem aradan qaldırılandan sonra keçirməyə və ya başqa zalda keçirməyə hazırdır. Çünki otel tədbirin təxirə salınmasının siyasi səbəblərlə bağlı olmadığı barədə məlumat yayıb. Biz otel rəhbərliyindən cavab gözləyirik", - deyə forum üzvü Eldar Namazov bildirib.

Ziyalılar eyni zamanda, cəmiyyəti narahat edən Dağlıq Qarabağ problemi, Minsk Qrupunun fəaliyyəti, danışıqlar prosesinin qapalı saxlanması, beynəlxalq rüşvət qalmaqallarında Azərbaycanın adının çəkilməsi, korrupsiyanın geniş vüsət alması, insan hüquqları sahəsində ağır vəziyyət, idxalda monopoliya və başqa problemlərə də toxunmaq istədiklərini bildirirlər.

Prezident Administrasiyasının rəhbəri Ramiz Mehdiyevin ünvanına ciddi tənqidlər səsləndirilib. "Demokratiyanın magistral yolu azad seçkilərdən keçir. İran şahı Məhəmməd Rza Pəhləvi belə utana-utana deyirdi ki, 3-4 nəfəri parlamentdə görmək istəyir. Amma Azərbaycanda Ramiz Mehdiyevin siyahısından kənarda bir nəfər belə parlamentə keçməyib",- deyə Cəmil Həsənli vurğulayıb.

Onun fikrini digər ziyalılar da müdafiə edib. "Nə qədər ki, eyni insanlar uzun müddət vəzifədədir, nə qədər ki, Ramiz Mehdiyev administrasiyanın rəhbəridir, islahatlar mümkün olmayacaq.

REKLAM

---

---

Onun rəhbərlik etdiyi aparat islahatların əleyhinə işləyir", - deyə Rüstəm İbrahimbəyov qeyd edib.

Ziyalılar ölkədə vəziyyətin gərgin olduğunu deyirlər. Onlar iddia edirlər ki, bütün statistika yalanlardan ibarətdir. Rüstəm İbrahimbəyov deyib ki, 5-6 adam dövləti öz maraqlarına işlədir. "Müstəqillikdən 20 il keçməsinə baxmayaraq, bu insanlar dəyişməyib. Azərbaycan məktəbləri rüşvət alanlar istehsal edir. Uşaq 3-4 yaşından rüşvətin nə olduğunu dərk edir. Məktəb illərindən başlayaraq rüşvətverənə çevrilir. Sonra rüşvəti həyat tərzinə çevirir və nəhayətdə özü rüşvətalan olur. Bu dəyişməlidir. Dəyişiklik üçün isə cəmiyyət qorxudan xilas olmalıdır, tənqid və ictimai nəzarət gücləndirilməlidir. Bunun üçün isə ilk öncə ziyalılar sözünü deməlidir", - deyə o qeyd edib.

Akademik Rafiq Əliyev isə xatırladır ki, birqütblü sistem ölümə məhkumdur:

"Birqütblü sistem dayanıqlı ola bilməz. Biz istəyirik ki, insanlar eşidilsin. İqtidar isə hər şeyi ya qaranlıqda görmək istəyir, ya da qaranlıq imitasiyası yaradır. Amma zorla qaranlıq yaratmaq mümkün deyil. Artıq ata-oğul nəsli deyil. Dünya dəyişib. İndi internetlə böyüyən, sosial şəbəkələrdə tərbiyə alan nəsil formalaşıb".