Azərbaycan milli komandasının baş məşqçisi Berti Foqts dünən doğum gününü qeyd edib. O, ad gününü dünyanın ən gözəl şəhərlərindən olan Dubayda keçirməyi üstün tutub - alman mütəxəssisin 65 yaşı tamam olub. Dubayda istirahətdə olan Foqts Azərbaycandakı dostlarını da yubileyinə dəvət edib.

Əsl adı Hans-Hubert Vogts olan Berti Foqts 1946-cı ildə Almaniyanın Düsseldorf əyalətinin Büttgen şəhərində doğulub. O, futbol karyerasına 1959-cu ildə, 13 yaşında olarkən, Büttgen şəhərinin eyniadlı uşaq futbol komandasında başlayıb.

Foqts peşəkar futbolçu karyerasında cəmi bir futbol klubunun şərəfini qorumasına baxmayaraq, böyük uğurlar əldə edib. 1965-ci ildə Münhenqladbax şəhərinin "Borussia" klubunda sağ müdafiəçi mövqeyində oynamağa başlayan Foqst, klubun tərkibində 5 dəfə Almaniya çempionu, bir dəfə Almaniya kubokunun və iki dəfə UEFA kubokunun sahibi olub.

Nümayiş etdirdiyi gözəl oyun sayəsində "Teryer" ləqəbini alan Foqts 1979-cu ildə, 33 yaşında olarkən peşəkar futbolçu karyerasını bitirib. Karyerası boyunca cəmi 419 oyun keçirən Foqst, bu oyunlarda 32 qol vurub. Avrokuboklarda bu göstərici 64 oyunda 8 qoldur.

Berti Foqst Almaniya Federativ Respublikasının gənclər yığmasının tərkibində 9, 23 yaşa qədər olan milli komandada 3 və ölkənin əsas yığmasının tərkibində 96 oyun keçirib. Foqts alman futbolunun tarixinə milli komandanın tərkibində ən çox oyun keçirmiş futbolçulardan biri kimi daxil olub. O, 20 oyunda meydançaya "komandanın kapitanı" sarğısı ilə çıxıb. Almaniya milli komandasının 1974-cü ildə dünya çempionu adını qazanması onun karyerasının ən uca zirvəsi sayılır.

Məşqçi karyerasına 1979-cu ildə Almaniyanın milli gənclər komandasında başlayan Foqst, 1986-cı ildən etibarən əsas millidə baş məşqçinin köməkçisi, 1990-cı ildən etibarən isə Almaniya milli komandasının baş məşqçisi olub. Onun başçılığı altında Almaniya millisi 1996-cı ildə İngiltərədə keçirilən Avropa çempionatının qalibi adını qazanıb. Lakin 1998-ci ildə dünya çempionatının 1/4 finalında Xorvatiya millisinə böyük hesabla uduzduqdan sonra Foqst yığmanın baş məşqçisi vəzifəsindən uzaqlaşdırılıb.

Daha sonra Foqst Leverkuzenin "Bayer" klubunun, Küveyt, Şotlandiya, Nigeriya milli yığma komandalarının baş məşqçisi olub. Foqst 2008-ci ilin mart ayından Azərbaycan milli komandasının baş məşqçisidir.