"Dövlət Sərhəd Xidməti tərəfindən "2006-2010-cu illərdə Azərbaycan Respublikası dövlət sərhədlərinin mühafizəsinin texniki inkişafına dair" Dövlət Proqramının icrası üzrə tədbirlər müvəffəqiyyətlə yekunlaşdırılıb". Bunu DSX-da 2011-ci ilin yekunlarına həsr olunmuş müşavirədə qurumun rəisi, general-leytenant Elçin Quliyev deyib. O bildirib ki, 2011-ci ildə dövlət sərhədlərinin mühafizəsi sisteminin təkmilləşdirilməsi məqsədilə ümumi büdcə ayrılmaları 2010-cu illə müqayisədə 121%, o cümlədən təkcə tikinti üzrə 184% artırılıb, nəticədə maddi-texniki bazanın gücləndirilməsi istiqamətində önəmli nailiyyətlər əldə olunub. Bu il 359 binadan ibarət 49 tikinti kompleksinin əsaslı təmir-tikintisi həyata keçirilib, hərbi hissələrdə zabit-gizir heyətinin məişət şəraitinin yaxşılaşdırılması üçün 1288 mənzil inşa edilib.
Elçin Quliyev xatırladıb ki, bu il ilk dəfə DSX Akademiyasının tərkibində dəniz və aviasiya kafedraları fəaliyyətə başlayıb və həmin ixtisaslar üzrə qəbul keçirilib. DSX Sahil Mühafizəsinin cənub, mərkəz və şimal şöbələri fəaliyyətə başlayıb. Xəzər dənizinin sahil xətti boyu sahil nəzarəti məntəqələri Sahil Mühafizəsinin tabeliyinə verilib və tam peşəkar heyətlə kompleksləşdirilib. Sahil Mühafizəsinə yüksək keçid qabiliyyətli vasitələrin verilməsi, Xəzər dənizində sərhəd gözətçi gəmiləri tərəfindən fasiləsiz xidmətin təşkil edilməsi sərhəd sularında Azərbaycanın mənafelərinin qorunması, həmçinin müşahidə və aşkaretmə imkanlarını əhəmiyyətli dərəcədə artırıb. Bu il həmçinin Hava Nəqliyyatında Sərhəd Nəzarəti Dəstəsi yaradılıb. Yeni istismara verilən Lənkəran və Qəbələ beynəlxalq hava limanlarında sərhəd nəzarəti təşkil edilib. Təmas xəttinə yaxın hərbi hissələr müasir döyüş texnikası və müşahidə vasitələri ilə təchiz olunub.
Elçin Quliyev bildirib ki, bu il Azərbaycan sərhədçiləri tərəfindən qanunsuz miqrasiya ilə məşğul olan 4 qrup, o cümlədən narkotiklərin qanunsuz dövriyyəsi ilə məşğul olan 6 mütəşəkkil dəstə zərərsizləşdirilib.
Quliyevin sözlərinə görə, dövlət sərhədinin əməliyyat yolu ilə mühafizəsinin gücləndirilməsi sayəsində Azərbaycana qarşı kəşfiyyat-pozuculuq məqsədi ilə xarici xüsusi xidmət orqanları ilə əməkdaşlıq edən 1 əcnəbi şəxs və terrorçuluğa qarşı mübarizə tədbirləri çərçivəsində xaricdə münaqişə zonalarında silahlı qruplaşmaların tərkibində döyüşmüş 15 şəxs müəyyənləşdirilib.
Hesabat dövründə axtarışda olan 1307 şəxs DSX əməkdaşları tərəfindən tutulub, 434 nəfərin ölkədən çıxışı qadağan edildiyi üçün Azərbaycandan çıxmasına icazə verilməyib. 251 nəfər isə ölkəyə girişi qadağan olunduğu üçün Azərbaycana buraxılmayıb.
|
