Bakı Metropoliteninin rəisi Tağı Əhmədovun dediyinə görə, bir çox ölkəyə nisbətən Azərbaycanda metroda gediş haqqı aşağıdır. Böyük Britaniya və dünyanın digər inkişaf etmiş ölkələrində həyat səviyyəsini Azərbaycanla müqayisə edən Əhmədov bildirir ki, o ölkələrdə metroda bir nəfərin gediş haqqı ölkəmizdən kifayət qədər çoxdur. Onun sözlərinə görə, metroda bir nəfərin gediş haqqı 72 qəpiyə başa gəlir, ancaq hazırda gediş haqqı 20 qəpikdir.
"Güzəran" Sosial Araşdırmaları Mərkəzinin sədri Qadir İbrahimli Azərbaycandakı gediş haqlarını dünya ölkələri ilə müqayisə etməyi gülünc sayır. Çünki xarici ölkələrdə metropoliten işçilərinin maaşları çox yüksəkdir və bu, maya dəyərində oturub. Azərbaycanda isə metro işçilərinin məvacibi dəfələrlə aşağıdır. Bundan əlavə müqayisə etdikləri ölkələrdəki xidməti Bakı Metropoliteninki ilə bir araya qoymaq mümkün deyir. Məsələn, orada qatarlar arasında intervallar maksimim 1 dəqiqədirsə, Bakıda minimum 2 dəqiqədir, bəzən 12 dəqiqəyə qədər uzanır.
Öyrəndik ki, iqtisadçı metroda sərnişin daşımanın maya dəyərini araşdırıb. Onun sözlərinə görə, bir sərnişinin daşıma xərci ən yaxşı halda 22 qəpiyə başa gəlir. İqtisadçi qeyd edir ki, ildə 2,2 milyon sərnişin metrodan istifadə edir. Bir ildə sərnişin daşınmadan 44 milyon manat vəsait əldə edilir. Hesab etsək ki, maya dəyəri 72 qəpikdir, o zaman Metropolitenin saxlanması üçün ildə 159 milyon manat vəsait lazımdır. Bunun 44 milyon manatı sərnişin daşınmadan əldə edilirsə, digər hissəsi dövlət büdcəsi hesabına ödənilir. 2012-ci ilin dövlət büdcəsinə ayrılan vəsaiti nəzərə alsaq, investisiya xərcləri istisna olmaqla, orta hesabla 17 milyon manat pul ayrılıb:
"Belə çıxır ki, dotasiya ilə birlikdə metropolitenə il ərzində 61 milyon vəsait bəs edir. Amma Tağı Əhmədov 72 qəpik deyəndə bu rəqəmin nəyə əsaslandığı məlum deyil".
Q.İbrahimlinin sözlərinə görə, metroda yerləşdirilən reklamlardan və ticarət obyektlərindən əldə olunan vəsait gizlədilir: "Bura qara bazara çevrilib. Tağı Əhmədovun özü də etiraf edir ki, burada yığılan vəsaitin heç kimə dəxli yoxdur. Ona görə də burada dövr edən milyonlarla vəsaiti hesablamaq mümkün deyil".
|
