Mətbuat hər bir ailəyə, vətəndaşa bilavasitə təsir göstərir. Odur ki, jurnalistlərin bu sahədə yüksək professional dəyərlərə istinad etməsi, problemlərlə dərindən tanış olması, belə faktları işıqlandırarkən peşə etikasına riayət etməsi vacibdir. Bu məqsədlə Ailə, Qadın və Uşaq Problemləri üzrə Dövlət Komitəsində "Gender əsaslı məişət zorakılığının aradan qaldırılması məqsədilə cəmiyyətin maarifləndirilməsində KİV-in rolu" mövzusunda təlim-seminar kecirilib.
Komitə sədri Hicran Hüseynova bildirib ki, bu gün jurnalistika kimi çətin peşə sahiblərinin içərisində qadınlar az deyil, onlar kişi həmkarları ilə birlikdə jurnalist peşəsinin ağırlığını öz çiyinlərində daşıyırlar. "Baxmayaraq ki, qadın jurnalistlərin peşəkarlıq baxımından özünütəsdiqi daha mürəkkəbdir", - deyə komitə sədri vurğulayıb.
Hüseynova bildirib ki, tək Azərbaycanda deyil, bütün dünyada jurnalistika çox məsuliyyətli fəaliyyət sahələrindən hesab olunur: "Media işçiləri unutmamalıdırlar ki, dərc olunan, efirdə nümayiş edilən hər bir məişət zorakılığı faktının arxasında insan və onun taleyi dayanır. Dözümlü, tolerant yanaşma nümayiş etdirən, aydın, dəqiq faktlara əsaslanan jurnalist işlərinə cəmiyyətin böyük ehtiyacı var".
Milli Televiziya və Radio Şurasından Sona Vəliyeva isə bildirib ki, qloballaşan ailə modelində Azərbaycan ailəsinin xüsusi yeri olduğu üçün jurnalistlər bu mövzuda həssas olmalıdırlar:
"Biz bu gün düşünməliyik, ailə və onun ətrafında baş verənlər haqqında necə yazaq ki, bu sahədə baş verənləri düzgün məcraya yönəldə bilək. Azərbaycan ailəsi min illərin təcrübəsini özündə toplayan milli-mənəvi dəyərlər sistemini özündə ehtiva edir. Azərbaycan dövləti milli-mənəvi amillərə, o cümlədən ailəyə böyük dəyər verərək onu dövlət siyasətinin tərkib hissəsi hesab edir. Jurnalistlər də daim bu prinsipi rəhbər tutsalar, yaxşı olar".
MTRŞ üzvü onu da jurnalistlərə xatırladıb ki, əgər bu gün hansısa şəxs ailədə, istərsə də cəmiyyətdə zorakılığa məruz qalırsa, bu, tək onun yox, onun ətrafının problemi hesab olunur: "O zaman belə nəticəyə gəlmək olar ki, həmin şəxsin timsalında cəmiyyətin bir hissəsi narahatlıqlar yaşayır. Mən çox istərdim ki, bu sahədə yazan jurnalistlər bu konteksti nəzərdən qaçırmasınlar".
"Azərbaycanda yeni ailə quran gənclərin ailə-məişət mövzusunda maarifləndirilməsi üçün istər Ailə, Qadın və Uşaq Problemləri üzrə Dövlət Komitəsi yanında, istərsə də digər formada layihələrə ehtiyac var" - Vəliyeva qeyd edir ki, yeni ailə quran gənclərlə gələcəkdə üzləşəcəkləri problemlər və bir sıra məsələlərlə bağlı vaxtında müzakirələr aparılmalıdır. "Bu gün insanların əsəbi o qədər gərgindir ki, onlar qadir olduqları və bacardıqlarına deyil, rastlarına çıxanlara malik olmaq istəyirlər. Ona görə də onların vaxtında maariflənməsinə nail olmaq lazımdır" - Vəliyeva bir MTRŞ üzvü olaraq bu kimi məqamlarda diqqətli olmağı tövsiyə edir. Məişət zorakılığı mövzusunda jurnalistlərin diqqətli olmalarının vacibliyini qeyd edən MTRŞ üzvü bildirib ki, bəzən jurnalistlər ailənin faciəsini düşünmədən yayımlayırlar, halbuki bu məsələdə "çox diqqətli olmaq lazımdır".
Sona Vəliyeva onu da bildirib ki, bəzi telekanallarda xalqın xeyrinə və maariflənməsinə faydalı olan verilişlər reytinq gətirmədiyi üçün təəssüf ki, bağlanıb. MTRŞ bu işlərə birbaşa müdaxilə edə bilməz, amma bu verilişlərə məsul olan şəxslərin öz içində daxili senzura olmalıdır: "Eyni zamanda jurnalistlər ekranlarda qoyduqları məsələlərə diqqətlə yanaşmalıdır. Bu gün verilişlərdə əksər sözlərin məğzinə varsaq görərik ki, çoxu kriminaldır. Bu, adətən hansısa ailənin yaşadığı faciədən bəhs edən verilişlər zamanı ortaya çıxır. Həmin verilişlər hazırlanarkən o qədər diqqətli olmaq lazımdır ki, müzakirə olunan faciə özü başqa bir faciə törətməsin".
|
