Güney azərbaycanlı tələbələrə qarşı hakimiyyətin təzyiqləri ara vermir. Bu günlərdə Binab şəhərinin yerli universitetinin bir qrup tələbəsi həmin ali təhsil ocağının təhlükəsizlik bölməsinə çağırılıb. Onlar hədələnməklə yanaşı, "Qərbyönlü siyasi-ideoloji cərəyanlara bağlılıqda və pantürkizmi təbliğ etməkdə" suçlandırılıblar. Hakimiyyətin bu yerli qurumu onlara özünəməxsus "xəbərdarlıq" edib.
Tələbələrin yataqxanadakı otaqlarının, mənzillərinin qanunsuz, yerli-yersiz yoxlanılması artıq adi hal alıb. Xəbərlərə görə, hakimiyyət təmsilçiləri bu sayaq "yoxlamaları" davamlı şəkildə aparsalar da, "şübhəli heç bir nəsnə" aşkarlaya bilməyiblər.
Polis bu sayaq davranışı ilə tələbələr, gənclər arasında xof yaradıb, onları davamlı olaraq nəzarət altında saxlamağa çalışır. Ötən həftə Zəncan şəhərindən olan yazıçı, jurnalist, hüquq müdafiəçisi Davud Xudayari yerli avtovağzalda həbs olunub. GənAz TV-nin məlumatına əsasən, ailəsi İnqilab Məhkəməsinin Zəncan bölməsinə müraciət etsə də, onun vəziyyəti və ittihamı barədə heç bir xəbər əldə edə bilmirlər. Hakim Dadyari isə bildirib ki, Xudayari barəsində "müvəqqəti həbs qərarı çıxarılıb, istintaq işləri davam edənə qədər" heç bir məlumat verə bilməz.
Qeyd edək ki, Davud Xudayari insan haqları fəalıdır, bundan öncə də dəfələrlə oxşar təzyiqlərə məruz qalıb.
Noyabrın 24-də Azərbaycan milli hərəkatının təəssübkeşi "Qaya" rəqs qrupunun rəhbəri, şair, Əhər Universitetinin tələbəsi Cəlal Salehpur (Bulud) ETTELAAT-ın Təbriz bölməsinin əməkdaşları tərəfindən həbs edilmişdir.
|
