İranda orta əsrlərə xas olan və çağdaş mədəni dünya tərəfindən pis baxılan edam formaları hələ də qüvvədə qalır və praktikada istifadə edilir. Gələn xəbərlərə görə, azərbaycanlı məhbus barəsində çıxarılmış belə bir dəhşətli hökm icra olunacaq. Tehran vilayəti Apellyasiya Məhkəməsinin 36-cı şöbəsi aşağı instansiya məhkəməsinin çıxardığı qərarı təsdiqləyib. Tehranda yaşayan Yaşar adlı azərbaycanlı barədə şirniyyat dükanından pul oğurladığına görə ümumi məhkəmə tərəfindən onun barəsində İslam cəza qanununun 198 və 201-ci maddələrinə əsasən əlinin kəsilməsi hökmü çıxarılıb. Hökm məhkəmənin icra qurumu tərəfindən həyata keçiriləcək.
Başqa bir xəbərə görə, "narkotik maddələrin satışında və cinsi təcavüzdə günahlandırılan" 15 nəfər dar ağacından asılıb. "Narkotik maddələrin satışında" ittiham olunan 11 nəfər Şiraz şəhərinin Adilabad zindanında, "cinsi təcavüzdə günahlandırılan" 4 nəfər isə Məşhəd və Şəhrikərd şəhərlərinin zindanlarında edam edilib. Edam olunanların adları mediaya açıqlanmayıb.
Noyabrın 29-da isə daha 9 məhbus dar ağacından asılıb. APA-nın məlumatına görə, məhbuslardan 8-i Kirmanşah vilayətində, biri isə Savə şəhərində edam olunub. Kirmanşah vilayətinin baş prokuroru Müctəba Maliki deyib ki, vilayətdə dara çəkilən məhbuslardan 6-sı külli miqdarda narkotik maddələrin daşınması, satışı və istifadəsində günahlandırılır. Onlardan 5-i kişi, biri isə qadındır. İki nəfər isə təcavüzdə ittiham olunub. 8 məhbus da xalqın gözü qarşısında edam olunub.
Savə şəhər prokurorluğundan isə bildirilib ki, "Xəlic fars" meydanında kütlənin iştirakı ilə bir nəfər dara çəkilib. Həmin məhbus oğurluqda və təcavüzdə günahlandırılıb.
|
