Əmək bazarında qadınların iştirak səviyyəsi aşağıdır, ancaq son zamanlar qadınların əmək bazarında iştirakı getdikcə artmaqdadır. Bu fikirləri Bakıda "İş yerlərində ayrı-seçkiliyin qarşısının alınmasında həmkarlar ittifaqlarının rolu" mövzusunda konfransda Həmkarlar İttifaqları Konfederasiyasının sədri, millət vəkili Səttar Mehbalıyev deyib.
Azərbaycanda qadınların əsasən təhsil və səhiyyə sistemində çalışdığını qeyd edən Mehbalıyev deyib ki, digər sahələrdə isə qadınların iştirak səviyyəsi aşağıdır. Azərbaycanda qızların əsasən humanitar sahələr üzrə təhsil almaqda maraqlı olduqlarını vurğulayan Mehbalıyev son zamanlar qızların arxitektura sahəsi üzrə də təhsil almağa maraq göstərdiklərini açıqlayıb və bildirib ki, bu da sevindirici haldır: "Bu, o deməkdir ki, ölkəmizdə qadınlar qeyri-ənənəvi sahələrdə də çalışmağa üstünlük verirlər".
Qurum sədri deyib ki, Azərbaycanın inkişafı, onun daha da demokratikləşməsində qadınların çox böyük rolu olmalıdır:
"O dövlətdə demokratiya inkişaf edəcəksə, orada qadınların hüquqları da qorunmalı, qadınlar ölkənin ictimai-siyasi həyatında fəal iştirak etməlidirlər. Əgər qadınlar dövlətin ictimai-siyasi həyatında fəal iştirak etmirlərsə, deyə bilərəm ki, orada demokratiya zəifdir və demokratiyanın gələcəyi sual altındadır".
Mehbalıyev xatırladıb ki, BMT-nin "Qadınlara qarşı ayrı-seçkiliyin bütün formalarının ləğv edilməsi haqqında" 1979-cu il Konvensiyası var və bu, xüsusi əhəmiyyətə malikdir. Onu da vurğulayıb ki, Həmkarlar İttifaqları Konfederasiyasında qadın hüquqlarının qorunması və onlara hüquqi yardım məqsədilə şura yaradılıb. Bu şura yerlərdən təqdim olunan şikayətlərin, əsasən də qadınların qarşılaşdığı problemlərin və ayrı-seçkilik faktlarının araşdırılması üçün fəaliyyət göstərir. Bundan başqa, konfederasiyanın hüquq şöbəsinə də tapşırılıb ki, hüquqi müstəvidə problemləri olan qadınlara yardım edilsin:
"Bu məsələdə qadınların həmkarlar təşkilatının üzvü olub-olmaması əsas deyil. İstənilən qadın bizə müraciət edərək, hüquq müstəvisində kömək ala bilər. Hətta həmin şöbə maddi tələb olmadan hüquqları pozulan qadınların vəkillə təmin olunmasına da kömək etməyə hazırdır".
Mehbalıyev deyib ki, Azərbaycanda qadınların işə qəbulu və hüquqları ilə bağlı problemlər var və bunun olmadığını demək yanlışlıqdır. Dövlət bu problemlərin həlli və tədbirlər görülməsi məqsədilə ayrıca struktur yaratmaqla yanaşı, müvafiq qanunvericilik bazası da formalaşdırıb. Buna baxmayaraq, bəzi işəgötürənlər qadınların işə qəbulu prosesində ayrı-seçkiliyə yol verirlər:
"İşə götürənlər sonradan ailə və uşaq məsələləri ilə bağlı qarşıya çıxan məsələlərlə bağlı yaranacaq problemlərdən kompensasiya olunmaq üçün qadınların işə götürülməsində ayrı-seçkilik edirlər. Əks cinsin nümayəndəsinə daha çox üstünlük verirlər".
Mehbalıyev qeyd edib ki, əmək qanunvericiliyinə görə, uşaqlı analar üçün iş prosesi zamanı güzəştlər tətbiq olunmalı və onların iş saatı az olmalıdır:
"Əfsuslar olsun ki, bunlar çox zaman həyata keçirilmir. Buna baxmayaraq, konfederasiya qadın hüquqlarının tanınması üçün müvafiq tədbirləri davam etdirir. Həmkar təşkilatları sahəsində 15638 qadın çalışır. Bunların mindən çoxu isə həmkarlar təşkilatı komitələrinin sədrləridir. Həmişə çalışırıq ki, qadınlara onların hüquqlarını izah edək".
|
