Dünən "Demokratiya üçün musiqi" kampaniyasının təşkilatçıları gələn həftə Bakıya gələn Avropa Birliyi xarici əlaqələr və təhlükəsizlik məsələləri üzrə ali komissarı Ketrin Eştona müraciət ediblər. Bu barədə "Turan"a İnsan Haqları Klubundan bildiriblər. Müraciətdə hüquq müdafiəçilərini narahat edən məsələlər vurğulanır və Azərbaycan hakimiyyət nümayəndələri ilə görüşdə Ketrin tərəfindən bu məsələlərin qaldırılması xahiş edilir. Xüsusilə "Xural" qəzetinin baş redaktoru Əvəz Zeynallının həbsi və qəzetin fəaliyyətinin dayandırılması, gənc fəallar Cabbar Savalanlı və Bəxtiyar Hacıyevin, 2 aprel aksiyasında iştiraka görə azadlıqdan məhrum edilən şəxslərin, hüquq müdafiəçisi Vidadi İsgəndərovun və AXCP fəalı Şahin Həsənlinin həbsdə saxlanılması, İslam Partiyasının sədri və üzvlərinin azadlıqdan məhrum edilməsi, insanların mülkiyyət hüquqlarının pozulması kimi problemlər Eştonun diqqətinə çatdırlıb.
"Demokratiya üçün musiqi" layihəsinin məqsədi "Avroviziya - 2012" mahnı müsabiqəsini Azərbaycanda insan hüquqlarının və demokratik dəyərlərin müdafiəsini təbliğ edən platforma kimi istifadə etmək, demokratik islahatların həyata keçirilməsinə çağırışlar etməkdir. Artıq 20-dən çox Azərbaycan QHT-si bu kampaniyaya qoşulub.
|
