Ermənistan-İran münasibətləri yüksək səviyyədədir. Trend-in məlumatına görə, bu barədə Ermənistan prezidenti Serj Sarqsyan çərşənbə axşamı İranın xarici işlər naziri Əli Əkbər Salehi ilə görüşündə bildirib. "Qeyd etməyə şadam ki, bu gün Ermənistan-İran münasibətləri yüksək səviyyədədir. Birgə proqramların sayı artır, mədəni mübadilə aktivləşir", - Prezidentin mətbuat xidməti Sarqsyandan sitat gətirir. "Novosti-Armeniya" yazır ki, prezident iki ölkə arasında iqtisadi əməkdaşlığın inkişaf səviyyəsindən də razılığını bildirib.
Sarqsyan ölkələr arasında sıx əməkdaşlığın sübutu kimi Ermənistanın və İranın yüksəkvəzifəli şəxslərinin qarşılıqlı səfərlərini göstərib. Öz növbəsində Salehi qeyd edib ki, İran Ermənistanın dostu kimi, daima Ermənistan-İran münasibətlərinin inkişafına sadiq qalacaq.
Müsahiblər İran prezidenti Mahmud Əhmədinejadın Ermənistana qarşıdakı səfəri kontekstində energetika, nəqliyyat, rabitə və kommunikasiyalar, eləcə də turizm və digər sahələrdə əməkdaşlıq məsələlərini müzakirə ediblər. Bir az əvvəl Ermənistanın xarici işlər naziri Edvard Nalbandyan bəyan etmişdi ki, İran prezidenti Mahmud Əhmədinejadın Ermənistana səfəri ilin sonuna planlaşdırılıb.
İran qaynaqlarına görə, Əhmədinejadın İrəvan səfəri çərçivəsində iki ölkə arasında qarşılıqlı əlaqə, bölgədəki vəziyyətə dair məsələlər müzakirə ediləcək. İqtisadi sahəyə dair bir sıra sənədlərin imzalanacağı da gözlənilir.
Əhmədinejad İrəvana bu il iyunun 6-da səfər etməli idi. Ancaq bu səfər təxirə salındı və bunun səbəbi açıqlanmadı. "İRNA" agentliyi İran Prezidenti Administrasiyasının açıqlamasına istinadla bunun səbəbinin Ermənistan tərəfinin imzalanacaq sənədləri hazırlamaması ilə əlaqədar olduğunu bildirmişdi.
Ancaq İran İnqilab Keşikçiləri Qvardiyasının keçmiş komandanı, Sistemin Məsləhətini Müəyyənləşdirən Qurumun üzvü Möhsün Rzaiyə bağlı "Tabnak" saytı səfərin təxirə salınmasını Əhmədinejadı müşayiət edən 2 rəsminin ölkədən çıxmasına qoyulan yasaqla əlaqələndirmişdi.
Salehi Ermənistanın enerji naziri Armen Movsesiyanın da qəbulunda olub. Tərəflər iki ölkə arasında "tarixi əlaqələrdən" danışdıqdan sonra enerji daşıyıcıları sahəsində ortaq layihələrdən söz açıblar. Hər iki nazir bu sahədə "əməkdaşlığın genişləndirilməsinin vacibliyini" vurğulayıblar.
|
