GünAz TV-nin xəbərinə görə, Təbrizdə azərbaycanlı öyrənci fəallar Behruz Fəridi, Arəş Məhəmmədi və Səyavuş Məhəmmədi ETTELAAT (İran Kəşfiyyat Nazirliyi) məmurları tərəfindən həbs olunublar. Hər üç öyrənci noyabrın 3-də səhər tezdən yaşadıqları mənzillərdə tutulublar. Mənzillərdə axtarış aparılıb, tələbələrə məxsus kompüterlər, kitablar və bir sıra digər şəxsi əşyalar götürülüb. İlk saatlarda tələbə fəalların nədə təqsirləndiyi və harada saxlandığı bilinmir. Sonra bəlli olub ki, onlar İnformasiya və Kəşfiyyat Nazirliyinin Təbriz şöbəsində saxlanırlar. Deməli, onlar siyasi zəmində həbs ediliblər. Qeyd edək ki, Güney Azərbaycanda həbsdə olan siyasi məhbusların əksəriyyəti ya universitet tələbəsidir, ya da siyasi fəaliyyətə tələbəlikdən başlamış fəallardır.
Başqa bir xəbərə görə, hazırda həbsdə olan Mehdi Həmidi Şəfiqin azadlığı yönündə fəaliyyət göstərən veb-laq yaradılıb. Bu gənc avqustun 24-də Təbrizin Qumtəpə məhəlləsində iftar zamanı oturub Urmu gölü məsələsini müzakirə edərkən həbs edilmiş 30 azərbaycanlı gəncdən biridir. Onlardan 15-nin məhkəməsi artıq başlanıb.
|
