Bakı Apellyasiya Məhkəməsində qaçaqmalçılıq yolu ilə İrandan ölkəmizə külli miqdarda narkotik vasitələr və silah-sursat keçirməkdə təqsirləndirilən Azərbaycan, Rusiya və İran vətəndaşlarından ibarət mütəşəkkil dəstə üzvlərinin apellyasiya şikayəti əsasında məhkəmə prosesi başa çatıb. APA-nın xəbərinə görə, prosesdə təqsirləndirilən şəxslərdən təkcə İbrahim Tanrıverdiyevin apellyasiya şikayəti təmin olunub. Onun cəzası 8 ildən 5 ilə endirilib. Digər təqsirləndirilən şəxslərin barəsində birinci instansiya məhkəməsinin çıxardığı hökm isə dəyişdirilmədən saxlanılıb. Qeyd edək ki, Bakı Ağır Cinayətlər Məhkəməsinin hökmü ilə dəstə üzvlərindən "Tovuzlu Alik" ləqəbi ilə tanınan Sadıqov Alyoşa Cəmil oğlu 10 il, Tanrıverdiyev İbrahim Hüseyn oğlu 8 il, Zadeh Germi Əkbər Əyyub oğlu 10 il, Vaytkeviç Anatoli Frantseviç 8 il, Bibin Gennadi Nikitoviç 8 il və Bibin Sergey Nikitoviç 9 il müddətinə azadlıqdan məhrum edilib. Onlar Cinayət Məcəlləsinin 206-cı (qaçaqmalçılıq), 234-cü (qanunsuz olaraq narkotik vasitələr əldə etmə, saxlama, satma, daşıma) və 228-ci (qanunsuz olaraq silah-sursat əldə etmə, saxlama, satma, daşıma, göndərmə) maddələri ilə ittiham olunurlar. Dəstə üzvləri Milli Təhlükəsizlik Nazirliyinin əməkdaşları tərəfindən yaxalanıblar.
|
