İsmət Yılmaz, Türkiyənin milli müdafiə naziri:

"Azərbaycanla hərbi və müdafiə sənayesi sahəsində əlaqələrimizi inkişaf etdirmək bizim əsas hədəfimizdir. Azərbaycan Silahlı Qüvvələrinin NATO standartlarında təhsil alması, silah və təchizata sahib olması bölgənin sabitliyi üçün vacibdir. Biz Türkiyə olaraq Azərbaycanın həm NATO, həm də digər Qərb təşkilatları ilə əməkdaşlığını dəstəkləyirik. Azərbaycanın NATO ilə Sülh Naminə Tərəfdaşlıq çərçivəsində davam etdirdiyi fəaliyyətlərin faydalı olduğunu, həmçinin bu əməkdaşlığın Azərbaycanın iqtisadi və siyasi maraqları baxımından əhəmiyyətli olduğunu düşünürük".

Telman Əbilov, Hərbçilərin Hüquqlarını Müdafiə Mərkəzinin direktoru:

"Bu gün Azərbaycanda hərbi qulluqçuların sosial təminatı çox aşağı səviyyədədir. Maraqlıdır, Müdafiə Nazirliyi hərbi qulluqçuların aldıqları məvaciblər barədə cəmiyyətə açıqlama vermir və bunu hərbi sirr hesab edir. Amma dünya ölkələrində belə hal yoxdur. Hərbi qulluqçuların maddi təminatı ilə bağlı məsələlər şəffaflaşmalıdır. Onların hansı vəziyyətdə yaşadığı, ağır sosial durumu ictimaiyyətin diqqətində olmalıdır. Bu gün zabitlərə kirayə üçün verilən vəsait çox aşağıdır. Şəhərdə kirayə üçün 47 manat verilir. Bu məbləğlə heç bir yerdə kirayə qalmaq olmaz. Rayonlarda ehtiyatda olanlara ayda 6 manat kirayə pulu verilir ki, bu da biabırçı rəqəmdir".

Siyavuş Novruzov, MM Təhlükəsizlik və müdafiə komitəsinin, NATO PA-dakı Azərbaycan heyətinin üzvü:

"Bu gün Azərbaycan ordusu NATO standartlarına cavab verir. Hazırda NATO ilə Azərbaycan arasında yüksək səviyyəli əməkdaşlıq mövcuddur. Biz postsovet ölkələri arasında istər hərbi, istər ictimai sahədə, istərsə də parlamentlərarası əlaqələr sahəsində çoxsaylı proqramlarda iştirak edirik. Postsovet ölkələri arasında NATO proqramlarında ən çox iştirak edən ölkə Azərbaycandır. Bu proqramlarda iştirak olduqca vacibdir. Bu proqramlar çərçivəsində bizim zabitlərimizin tədrisi, yeni silahların istifadə qaydalarının hərbçilərimizə öyrədilməsi və ümumilikdə ordunun NATO standartlarına uyğunlaşdırılma prosesi həyata keçirilir. Bu gün Azərbaycan Ordusu həm təhsil, həm rabitə, həm də digər məsələlərdə NATO standartlarına uyğunlaşıb".

Tərlan Eyvazov, Müdafiə və Təhlükəsizlik Sektoruna İctimai Nəzarət Mərkəzinin direktoru:

"Xəzər dənizinin təhlükəsizliyi məsələsində ABŞ və Azərbaycan münasibətlərinin sıxlaşması vacibdir. Azərbaycan dövlət qurumlarının tam heyətdə ABŞ-a səfər etməsi təqdirəlayiq haldı. Xəzər dənizində enerji layihələrinin mühafizəsi sahəsində ABŞ-la birgə əməkdaşlıq regionun təhlükəsizlik problemlərinin həllində müsbət nəticələr yaradacaq. Rusiya və İran Xəzərdə hərbi baxımdan taktiki və strateji addımlar atır. Rusiya bu yaxınlarda irihəcmli gəmisini Xəzərə buraxdı. İranın Xəzər dənizinin təhlükəsizliyi ilə bağlı fərqli planları var və daha çox destruktiv xarakter daşıyır. Belə bir vəziyyətdə Azərbaycanın ABŞ-la yaxınlanması daha məqsədəuyğundur. Yaxın perspektivdə Xəzərdə enerji layihələrinin mühafizəsinə ABŞ-ın dəstəyinə dair rəsmi Bakı və Vaşinqton arasında razılaşma əldə olunacağı mümkündür".