Şirvan Apelyasiya Məhkəməsində Ermənistan xüsusi xidmət orqanları ilə əməkdaşlığa cəlb edilən hərbçilərdən ibarət mütəşəkkil dəstə üzvlərinin apelyasiya şikayəti üzrə məhkəmə başa çatıb.
Hakim Kamran Əkbərovun sədrliyi ilə keçirilən prosesdə Müdafiə Nazirliyinin "N" saylı hərbi hissəsinin hərbi qulluqçuları - Musa Haqverdiyevin, Elvin Qasımovun, Vasif Məmmədovun, Elşən Süleymanovun, Elvin Həsənovun, Rasim Əliyevin və Məhəmməd Abdullayevin apelyasiya şikayəti üzrə qərar elan edilib.
Qərara görə, təqsirləndirilən şəxslərin apelyasiya şikayəti təmin edilməyib və Tərtər Hərbi Məhkəməsinin hökmü qüvvədə saxlanılıb.
Tərtər Hərbi Məhkəməsinin hökmü ilə Musa Haqverdiyev 10 il 6 ay, Elvin Qasımov 12 il, Vasif Məmmədov 11 il, Elşən Süleymanov 11 il, Elvin Həsənov 10 il 4 ay müddətinə azadlıqdan məhrum ediliblər. Digər təqsirləndirilən şəxslər - Rasim Əliyev və Məhəmməd Abdullayev 500 manat cərimə olunublar.
Təqsirləndirilən şəxslər CM 274-cü (dövlətə xəyanət), 338.1-ci (Azərbaycan Respublikasına qəfil hücumun vaxtında aşkara çıxarılması və dəf olunması üzrə, yaxud onun təhlükəsizliyinin təmin edilməsi üzrə döyüş növbəsi (döyüş xidməti) çəkmə qaydalarını pozma), 177.2.1, 177.2.2-ci (oğurluq) maddələri ilə ittiham ediliblər.
İttiham aktına görə, onlar hərbi xidmətdə olarkən erməni xüsusi xidmət orqanı əməkdaşlarına hərbi hissə və Azərbaycan ordusu barədə mütəmadi məlumatlar veriblər.
Onlar hərbi hissədə olan şəxsi heyətin (zabit və əsgərlərin) sayını, xidmətə necə, əsasən hansı istiqamətlərə və hansı intervalla çıxdıqlarını və digər bu kimi məlumatları erməni xüsusi xidmət orqanı əməkdaşlarına ötürüblər.
Bundan başqa, təqsirləndirilən şəxslər hərbi hissədə döyüş sursatı hesab edilən silah-sursat oğurluğunda ittiham ediliblər.
|
