Əcnəbi jurnalistlərin döyülməsi ilə bağlı məhkəmə başladı

ABŞ vətəndaşı Amanda Erikson və Böyük Britaniya vətəndaşı Celia Daviesi döyməkdə təqsirləndirilən Adil Tağızadə, Roman Həsənov, Vüsal Qurbanov və Nazim Hüseynovun cinayət işi üzrə məhkəmə başladı. Proses Yasamal Məhkəməsində keçirilir.

Hakim Elçin Qurbanovun sədrliyi ilə keçirilən prosesin əvvəlində dövlət ittihamçısı Rizvan Sultanov ittiham aktını elan etdi. Prokurorun səsləndirdiyi ittihamdan bəlli oldu ki, təqsirləndirilən şəxslər iyunun 15-dən 16-na keçən gecə Akademik Milli Dram Teatrının binasının arxa tərəfində Amanda Eriksonla Celia Daviesə hücum edib, onları yerə yıxaraq döyüblər. Prokuror bildirdi ki, təqsirləndirilənlər ibtidai istintaqa etirafedici ifadələr veriblər.

Lakin məhkəmədə həmin ifadələrindən imtina etdilər. Onlar bildirdilər ki, istintaq vaxtı vəkillə formal şəkildə təmin olunublar, faktiki isə onlara vəkil xidməti göstərilməyib, hüquqları izah olunmayıb. Müstəntiq kompüterdə yazdığı hazır ifadələrə onlara imza atdırıb. Onlar ifadələrlə tanış olmaq istəsələr də, müstəntiq vaxt azlığını bəhanə gətirərək buna imkan yaratmayıb. Təqsirləndirilən şəxslər belə dedilər. Müttəhim Adil Tağızadə:

"Bizə ittiham veriblər ki, guya onlarla tanış olmaq üçün yaxınlaşmışıq və onları döymüşük. Bizim belə fikrimiz olmayıb, onlar ikisi də sərxoş idilər, mən birinə yaxınlaşıb əlimlə kürəyinə vurdum, dedim, sizə kömək lazımdır. Onlar qorxdular, qışqırmağa başladılar, onda bildik ki, xaricidilər. Dayım oğlu Nazim öz telefonunu onlardan birinə uzatdı, dedi ki, qorxmayın, istəyirsinizsə, "102" xidmətinə zəng edin. Qız telefonu alıb yerə çırpdı, telefon sınıq-sınıq oldu. Biz onları yerə yıxmamışıq, döyməmişik. Özləri sərxoş idilər deyə, qaçanda bir-birlərinə dəyib yıxıldılar".

Digər müttəhimlər də məhkəmədə oxşar ifadələr verdilər.

REKLAM

Qızların sərxoş olduqlarını, qaçarkən yerə yıxıldıqlarını deyiblər. Zərərçəkmiş Celia Davies məhkəməyə dedi ki, müttəhimlər yalan danışır:

"Onlar dalımızca düşmüşdülər, bizə baxıb bərkdən gülürdülər. Bizə çatanda onlardan biri çantalarımızı əlimizdən alıb yerə tulladı. Onların nə dediklərini başa düşmürdük. Bizi itələyib yerə yıxdılar".

Onun sözlərinə görə, onlara hücum edən şəxslər hədə-qorxu gəlməyə başlayıblar. Zərərçəkmişin dediyinə görə, səs-küy saldıqları üçün həmin şəxslər aradan çıxıblar:

"Həmin vaxt yaxınlıqda bir maşın vardı. Maşının içində olan şəxs özünü polis əməkdaşı kimi təqdim etdi və bizi şikayət etmək üçün polis idarəsinə aparmağı təklif etsə də, biz onunla getmədik. Çünki bu cür hadisədən sonra tanımadığımız şəxsin maşınına minməyə ehtiyat etdik. Başımıza gələnlərlə bağlı ABŞ səfirliyinə məlumat verdik. Təxminən 15-20 dəqiqə ərzində ABŞ səfirliyinin təhlükəsizlik xidmətinin əməkdaşları hadisə yerinə gəldilər, bizi oradan apardılar".

Zərərçəkmiş təqsirləndirilən şəxsləri tanımadığını bildirdi. O qeyd etdi ki, hadisə zamanı o, arxadan vurulduğu üçün həmin şəxsləri görə bilməyib. Əcnəbi xanım onu da bildirdi ki, hadisə zamanı sərxoş vəziyyətdə olmayıb.

Təqsirləndirilən Adil Tağızadə bildirdi ki, tanış olmaq üçün əcnəbilərə yaxınlaşıb. Adil Tağızadə onu da bildirdi ki, qızlara yaxınlaşan zaman onların sərxoş olmalarının şahidi olub. Məhkəmə iclası oktyabrın 27-də davam etdiriləcək. Digər zərərçəkmiş Amanda Erikson ABŞ-da olduğundan məhkəmədə iştirak etməyib.

Qeyd edək ki, DİN iyunun 15-dən 16-na keçən gecə Bakıda döyülən amerikalı jurnalist Amanda Erikson və britaniyalı hüquq müdafiəçisi Celia Davies haqda məlumat yaymışdı. Hadisə baş verən dövrdə Amanda Erikson və Celia Davies yerli jurnalistlər və vətəndaş cəmiyyəti fəalları üçün treninqlər keçirdilər. Amanda Erikson "Washington Post" və "New York Times" qəzetləri ilə əməkdaşlıq edir.