İran hakimiyyəti insan haqlarını pozduğuna, terrorçuluğu dəstəklədiyinə görə ötən həftə BMT, Avropa Birliyi və ABŞ-ın kəskin tənqidinə məruz qalıb. BMT baş katibi Pan Gi Munun İranda insan hüquqlarının vəziyyəti barədə illik hesabatında deyilir:
"İranda hüquq müdafiəçilərinə, qadın fəallara, jurnalistlərə və dinc müxaliflərə qarşı repressiyalar, təzyiqlər gündən-günə artıb və şiddətlənib. 2011-ci ildən başlayaraq ictimaiyyət qarşısında həyata keçirilən edamların sayı qat-qat artıb. Edamların bu şəkildə həyata keçirilməsi isə ölüm cəzasının qeyri-insani, təhqiramiz və rəhmsiz mahiyyətini şiddətləndirir. Edam olunanlar arasında siyasi məhbusların və 18 yaşına çatmamış uşaqların da olduğu haqda məlumatlar yayılıb.
2010-cu ildə 252 nəfərin edam olunması rəsmən bildirilsə də, həmin ildə 300 nəfər də Məşhəd şəhərinin Vəkilabad zindanında gizli şəkildə dar ağacından asılıb".
Hesabatında İranda dini azlıq nümayəndələrinə, o sıradan da bəhailərə, müstəqil vəkillərə, kino xadimlərinə, qadın fəallara, jurnalistlərə və ayrı-ayrı dissident ziyalılara qarşı təzyiqlərin geniş vüsət aldığını vurğulayan Pan Gi Mun İran hakimiyyətini qadınlara qarşı təzyiqlərə son qoymağa, işgəncə və edamları dayandırmağa və insan hüquqları ilə bağlı beynəlxalq öhdəlikləri yerinə yetirməyə çağırıb.
|
