Sentyabr ayı ərzində Dövlət Sərhəd Xidməti (DSX) tərəfindən dövlət sərhədini pozduqları üçün 45 halda 73 nəfər saxlanıb. Bu barədə APA-ya DSX mətbuat mərkəzindən bildirilib. Sərhəd nəzarəti məntəqələrində 36 halda 63 nəfər saxta sənədlə, 1 halda 1 nəfər özgəsinə məxsus sənədlə, 1 halda 1 nəfər gizli şəkildə dövlət sərhədindən keçməyə cəhd edərkən saxlanılıb. Sərhəd zastavalarının xidməti ərazilərindən 9 halda 12 nəfərin dövlət sərhədini pozmaq cəhdinin qarşısı alınıb. Cinayətkarlığa qarşı mübarizə tədbirləri nəticəsində ölkə hüquq- mühafizə orqanları tərəfindən axtarışda olan 124 nəfər aşkarlanaraq aidiyyəti orqanlara təhvil verilib. Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 10 halda 511,5 qram narkotik maddənin dövlət sərhədindən keçirilməsinin qarşısı alınıb. Qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində 76 halda ümumi dəyəri təqribən 78 min 265 manat olan qaçaqmal, o cümlədən 2500 ədəd 12 mm-lik patron, 1608 ədəd pnevmatik tüfəng patronu, tir tüfəngi üçün 23 ədəd qundaq və 20 ədəd lülə, 1415 kq qırma, 45 ədəd qızıl zinət əşyası, 1830 ədəd zərgərlik məmulatları düzəltmək üçün alət, 47 ədəd mobil telefon, 179 ədəd mobil telefon aksesuarı, 12 baş xırdabuynuzlu heyvan, müxtəlif spirtli içkilər, ərzaq və sənaye malları saxlanılıb. Ölkənin dəniz sərhədləri istiqamətində dövlət sərhədinin mühafizəsi və sərhəd rejim qaydalarının qorunması istiqamətində keçirilmiş tədbirlər nəticəsində 27 halda 58 nəfər sərhəd rejim pozucusu saxlanılıb, dənizdən 18050 metr tor, 19557 ədəd qarmaq, 5 ədəd qayıq, 1 ədəd mühərrik aşkar olunaraq götürülüb.