Ölkənin təhsil sferasında böyük saxtakarlıqların üstü açılıb. Ən ağır gələn budur ki, bu saxtakarlar gənc nəslin təlim-tərbiyəsi ilə məşğul olublar və nə kimi insan yetişdirdiklərini yalnız təsəvvürə gətirmək olar.
Ümumtəhsil müəssisələrində çalışan müəllimlərin diplomlarının yoxlanılması istiqamətində Təhsil Nazirliyi tərəfindən həyata keçirilən tədbirlər çərçivəsində 24 rayon üzrə araşdırma başa çatıb. Nazirlikdən APA-ya verilən məlumata görə, araşdırmalar nəticəsində müəyyən olunub ki, rayonların ümumtəhsil müəssisələrində çalışan pedaqoji işçilərdən 92-nin diplomu saxtadır. Saxta diplomların 24-ü Bərdə, 12-si Quba, 7-si Cəlilabad, 7-si Beyləqan, qalanı isə digər 20 rayonda aşkar edilib. Məsələnin araşdırılması ilə bağlı Təhsil Nazirliyi tərəfindən Baş Prokurorluğa müraciət olunub.
Qeyd edək ki, saxta diplomların aşkarlanması məqsədilə Təhsil Nazirliyi tərəfindən daha 25 rayonun ümumtəhsil müəssisələrində araşdırmalara başlanılıb.
Əldə olan bilgilərə görə, bütün orta məktəb müəllimlərinin sənədləri araşdırılır. Nazir Misir Mərdanov bildirib ki, "Bu adamların saxta diplomlarla məktəbə gedib çıxma səbəblərini araşdırırıq. Buna şərait yaradanlar cəzalandırılacaq". Nazirin sözlərinə görə, hazırda bütün ölkə üzrə müəllimlərin sənədləri araşdırılır. Nazir deyir:
"Məlum olub ki, çox müəllimin sənədi saxtadır. Məsələn, sənəddə yazılıb ki, BDU-nun riyaziyyat fakültəsini bitirib, amma Təhsil Nazirliyindən aldığı diplomun nömrəsi bu adamın adına deyil. Təəssüf ki, belə hallarla qarşılaşırıq".
Mərdanov bildirib ki, nazirlik bu məsələdə Respublika Prokurorluğu ilə birgə araşdırma aparır: "Hələlik rayon-rayon araşdırırıq. Kimin bizdən narazı olub-olmamasına baxmayaraq, saxta diplomluları işdən azad edəcəyik".
|
