Neft Akademiyasında (ADNA) 2009-cu il aprelin 30-da baş verən kütləvi terrorla bağlı təqsirli bilinən Gürcüstan vətəndaşları Nadir Əliyev, Cavidan Amirov və Nəcəf Süleymanov Bakı Apellyasiya Məhkəməsinin barələrindəki qərarından kassasiya şikayəti veriblər.
Təqsirli bilinənlərin şikayətlərinə Ali Məhkəmənin hakimi Hafiz Nəsibov baxacaq. İclas oktyabrın 19-da 11:10-a təyin olunub. İş üzrə təqsirləndirilənlərdən yalnız Ariz Qabulov şikayət verməyib.
Qeyd edək ki, Ağır Cinayətlərə Dair İşlər üzrə Məhkəmənin 10 avqust tarixli hökmü ilə Nadir Əliyev, Cavidan Amirov, Nəcəf Süleymanov ömürlük, Ariz Qabulov isə 11 il müddətinə azadlıqdan məhrum ediliblər. Təqsirləndirilənlər ittihamları qəbul etməyiblər, baş vermiş terror olayını onların üzərinə qoymaqla cinayətin ört-basdır edildiyini söyləyiblər.
İşə Bakı Apellyasiya Məhkəməsində baxılarkən Nadir Əliyev onların apellyasiya şikayəti verməmələri üçün 1 ay ayaqlarından asılı vəziyyətdə saxlanıldığını və işgəncə verildiyini deyib.
Xatırladaq ki, 2009-cu il aprelin 30-da ADNA-nın Bakı şəhəri Dilarə Əliyeva küçəsi, 227 saylı ünvanda yerləşən ikinci korpusuna daxil olan naməlum şəxsin inzibati binanın birinci mərtəbəsindən altıncı mərtəbəsinədək qarşısına çıxan şəxslərə "Makarov" tipli tapançadan atəş açması nəticəsində 12 nəfər ölüb, 13 nəfər müxtəlif dərəcəli bədən xəsarətləri alıb. Hadisəni törədən şəxs sonra özünü vurub. Onun Gürcüstan vətəndaşı, 1980-ci il təvəllüdlü Qədirov Fərda Əsəd oğlu olduğu müəyyən edilib.
|
