İranın energetika naziri Məcid Namcunun sözlərinə görə, Urmiya gölünə Araz çayının onlara aid hissəsindən su aparılacaq. Nazir bunu belə əsaslandırır ki, Araz sərhədyanı çaydır və iki dövlət arasındakı müqaviləyə görə, onun 50 faizi İrana, qalanı isə Azərbaycana məxsusdur. Tərəflərin payı müəyyənləşdirilib və İran öz payından Urmiya gölünə su yönəltməyi planlaşdırır.
Bizim ekologiya və təbii sərvətlər nazirimiz Hüseynqulu Bağırov isə bildirir ki, İran tərəfi Urmiya gölünə Arazdan su aparmaq məsələsini Azərbaycan tərəfi ilə razılaşdırmalıdır.
Hələlik rəsmi Tehran bu məsələ ilə bağlı Bakıya müraciət etməyib. İranın təbliğat maşınının qənaətincə isə, "Azərbaycanın ekologiya və təbii sərvətlər naziri Arazın suyunun Urmiya gölünə axıdılmasından narahatdır".
İranın Ətraf Mühit və Ekologiya təşkilatının rəhbəri Məhəmmədöavad Məhəmmədzadə məsələ ilə bağlı söyləmişdi ki, Urmiya gölünə Araz və Silvan çaylarından su kəməri çəkmək planlaşdırılıb və bu layihə üçün 900 milyon dollar vəsait ayrılıb.
İran prezidentinin parlament məsələləri üzrə müavini Məhəmmədrza Mirtacəddini jurnalistlərə açıqlamasında hökumətin Urmiya gölünün probleminin həlli üçün Nazirlər Kabinetində ciddi müzakirələr aparıldığını, qərarlar qəbul edildiyini və bu məqsəd üçün 20 milyon dollar ayrıldığını demişdi.
Urmiya gölünün ekoloji fəlakətinə etirazların Tehranı ciddi narahat etdiyi və bu vəziyyəti yumşaltmaq üçün hər tədbirə əl atdığı gözdən qaçmır. Məsələn, bu günlərdə onun informasiya vasitələri gölün səviyyəsinin 80-100 sm qalxdığına dair xəbərlər yaydı.
Ekoloqların və hidroloqların mülahizəsi belədir ki, gölün qurumasına səbəb su ehtiyatlarından savadsız istifadədir. Tehranda elə fikirləşiblər ki, narahatlığa əsas yoxdur, çünki yağıntı düşməsə belə Urmiya özünü su ilə təmin edə bilər, çünki ona yeraltı çaylar axır.
|
