"Azərbaycana səfərdə məqsəd Güney Azərbaycanda insan hüquqları problemini və Urmiya gölü ətrafında vəziyyəti aktuallaşdırmaqdır", - dünənki mətbuat konfransında Cənubi Azərbaycan Demokrat Partiyasının spikeri Mahmud Bilgin bildirib. Onun sözlərinə görə, "Bütöv Azərbaycan" gənclər təşkilatının dəvətilə təşkil olunmuş ongünlük səfər zamanı siyasi partiyalar, KİV mənsubları, ictimai xadimlər və gənclərlə görüşüb. O, Gəncədə də olub. "Mənə dedilər ki, mən Cənubi Azərbaycan milli-azadlıq hərəkatının ilk fəalıyam ki, Gəncəyə səfər etmişəm. Mən bundan qürur duydum", - M.Bilgin vurğulayıb ("Turan").
Güney Azərbaycan milli-azadlıq hərəkatı tarixinə toxunan Bilgin xatırladıb ki, ilk güclü dalğa 1945-46-cı illərdə olub. Sonradan şah rejimi milli hərəkatı boğa bilib. İkinci dalğa 1995-ci ildə başlayıb və indiyədək davam edir. Çoxsaylı həbslərə və təqiblərə baxmayaraq, müqavimət hərəkatı qızışır.
Urmiya gölünə gəlincə, əgər təcili tədbirlər görülməsə, üç ildən sonra göl tamam quruyacaq ki, bu da ekoloji fəlakətə səbəb olacaq. Gölün dibindəki 10 mlrd. ton duzu külək 15 mln. adamın yaşadığı əraziyə sovuracaq və onlar öz evlərini tərk etməyə məcbur olacaqlar. "Biz Urmiya gölünün qurumasına imkan verməməyə çağırırıq", - Bilgin vurğulayıb.
Mahmud Bilgin Güney Azərbaycan Milli Oyanış Hərəkatının təməlini qoyanlardan biridir. 1988-ci ildə İran hüdudlarını tərk edib və 24 ildir İsveçdə yaşayır. Təmsil etdiyi partiya 2008-ci ildə yaradılıb.
|
