Dünya Azərbaycanlıları Konqresi (DAK) rəhbərliyi cümə günü "Trend" agentliyinin konfrans zalında mətbuat konfransı keçirib. DAK həmsədri Sabir Rüstəmxanlı son bir həftə ərzində DAK İdarə Heyətinin Azərbaycanın dövlət müstəqilliyinin 20 illiyilə bağlı Bakıda keçirdiyi tədbirlərə toxunub və bu fəaliyyəti uğurlu adlandırıb ("Turan").
Eyni zamanda son zamanlar DAK-da parçalanmalar haqda yayılan xəbərlərin əsassız olduğu və DAK-ın bir neçə nəfər istisna olmaqla, əksər rəhbər heyətinin yerində olduğu vurğulanıb. DAK-ın bu günlərdə İranın Azərbaycan səfirliyi önündə keçirdiyi aksiya yerinə düşən aksiya kimi dəyərləndirilib. Qeyd olunub ki, bu həftə ərzində DAK rəhbərliyinin müxtəlif səviyyədə görüşləri keçirilib. Oktyabrın 7-də Milli Məclis rəhbərliyi ilə görüş olacağı qeyd edilib.
İranın Azərbaycanda mədəniyyət günləri keçirməsinə sərt təpki göstərilib. "Urmiya gölünün qurudulmasına etiraz edən azərbaycanlıları həbsə alan İran dövlətinin Azərbaycanda mədəniyyət günləri keçirməsi gülüncdür" deyən tədbir iştirakçıları İranı Azərbaycana münasibətdə ikiüzlü siyasətdə ittiham ediblər. DAK-ın mübarizəsinin Güney Azərbaycana ən güclü mənəvi dəstək olmasının vacibliyi vurğulanıb.
"Ərəb baharı"nın tədricən İrana yaxınlaşdığı bildirilməklə yanaşı həm də Azərbaycanın buna hazır olmasının vacibliyi nəzərə çatdırılıb. Natiqlər dövlətlərin bir-birinin işinə qarışmadığını desələr də, millətin özündən olanlara dəstək verməsinin zərurət olduğunu xüsusi vurğulayıblar. Bu mənada Güney Azərbaycanın mübarizəsini dünya siyasi gündəminə daşımaq DAK-ın birbaşa fəaliyyəti olduğu bildirilib.
Urmiya gölünün qurudulmasına etiraz edən yüzlərlə azərbaycanlının artıq Tehranın "Evin" həbsxanasına aparıldığı nəzərə çatdırılıb. İran Azərbaycanın daxilinə din, məzhəb davası salmaq, terrorla hədələmək kimi təhdidlərə yol verib. "Dünya elmi öyrənir, kosmosu, digər planetləri fəth edir, bizə xurafat, cəhalət öyrətmək istəyirlər", - DAK Daimi Şurasının sədri Əjdər Tağızadə İranla əlaqələrdən Azərbaycana xeyir gəlməyəcəyini demişdir.
|
