Azərbaycanda "elektron imza" ("e-imza") istifadəsinin təşkili üçün Rabitə və İnformasiya Texnologiyaları Nazirliyi tərəfindən yaradılmış Milli Sertifikat Xidmətləri Mərkəzinin (MSXM) tərkibində dövlət orqanları, vətəndaşlar və biznes qurumlara "e-imza" xidmətləri göstərən "Hökumət orqanları sertifikasiya xidməti mərkəzi" və "Elektron hökumət sertifikasiya xidməti mərkəzi" təşkil edilib.
Nazirlikdən verilən açıqlamaya görə, artıq MSXM-in yaradılması başa çatdırılıb və "e-imza"nın tətbiqinə başlanıb. Elektron xidmətlərin "e-imza"nın tətbiqi ilə həyata keçirilməsi üçün zəruri tədbirlər görmək məqsədilə mərkəzi icra hakimiyyəti orqanlarına müraciət olunub. Hüquqi və fiziki şəxslərə "e-imza" xidmətlərinin ölkənin poçt şöbələrində yaradılan qeydiyyat mərkəzlərində göstərilməsi nəzərdə tutulur. "E-imza"dan istifadə qiymətləri beynəlxalq təcrübə nəzərə alınmaqla müəyyən olunub və iqtisadi cəhətdən əsaslandırılıb və əhali üçün güzəştli qiymətlər tətbiq edilib.
Artıq RİTN ölkə başçısı tərəfindən imzalanmış "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında" fərmanın icrasının təmini ilə bağlı konkret tədbirlər müəyyənləşdirib və ayrı-ayrı dövlət orqanları tərəfindən bu istiqamətdə görülən işlərin əlaqələndirilməsi məqsədilə xüsusi tədbirlər planı hazırlayıb. Sözügedən tədbirlər planına uyğun olaraq, ilk növbədə mərkəzi icra hakimiyyəti orqanlarında İKT-nin tətbiqi ilə dövlət qurumlarına, fiziki və hüquqi şəxslərə elektron xidmətlər göstərilməsi fəaliyyətinin tənzimlənməsi məqsədilə "Mərkəzi icra hakimiyyəti orqanları tərəfindən elektron xidmətlər göstərilməsi Qaydaları"nın və "Nümunəvi inzibati reqlament"in layihələri hazırlanıb.
Bundan başqa, mərkəzi icra hakimiyyəti orqanlarından daxil olan təkliflərin beynəlxalq təcrübəyə uyğun təhlili əsasında onlar tərəfindən konkret sahələr üzrə göstəriləcək elektron xidmət növləri müəyyən edilib. Bu sənədlər aidiyyəti üzrə razılaşdırılaraq təsdiq edilməsi üçün Nazirlər Kabinetinə təqdim olunub.
Fiziki şəxslər "e-imza"dan istifadə etmək üçün poçt şöbələrinin filiallarına müraciət etməli, müvafiq kart və avadanlığı əldə etməlidir. İlkin olaraq "e-imza" üçün fiziki şəxslərin 1 il üçün 14 manat (ƏDV daxil), növbəti il üçün 8 manat, 3-cü il üçünsə bundan da ucuz məbləğ ödəməsi nəzərdə tutulur.
İnternet provayderlərinə gəlincə, RİTN-dən bildirilib ki, ölkədə internetin inkişafı və yeni xidmətlərə tələbatın artması ilə əlaqədar dövlət internet provayderləri - "Aztelekom" və "Bakinternet" şirkətləri oktyabr ayının 1-dən genişzolaqlı internet xidmətlərinin qiymətlərinin aşağı salındığını elan edib. Bu dəfə dövlət provayderlərinin tarifləri kanalın sürətindən asılı olaraq faiz nisbəti ilə 25-50% arasında aşağı salınıb (orta hesabla 40%).
Provayderlərin xidmətlərinə əvvəllər qoşulmuş abonentlərin kanal sürəti artırılacaq. Məsələn, əvvəllər 1 Mbit/s kanal sürəti üçün 20 manat ödəyən abonent, oktyabrın 1-dən etibarən internetə 2 Mbit/s sürəti ilə daxil olacaq.
Əhalinin sosial rifahını nəzərə alan nazirlik Bakıda telefon çəkilişi üçün xərclərin 50% azaldılacağını da elan edib. Nazirlikdən verilən məlumata görə, Bakı Telefon Rabitəsi İstehsalat Birliyi (BTRİB) "Azərbaycanın Dövlət Müstəqilliyinin 20 illik yubileyi" və "Azərbaycanda telefon rabitəsinin yaranmasının 130 illiyi" ilə əlaqədar oktyabrın 1-dən dekabrın 10-dək texniki imkan olan kabelləşdirilmiş köhnə və yeni (yeni kabelləşdirilən binalardan və hava rabitə xətləri olan ərazilərdən başqa) binalarda əhali və təşkilatlara 1-ci və 2-ci telefon 50% güzəştli tariflə, 2 ədəd telefon çəkənlərə isə 3-cü telefonu pulsuz çəkmək üçün kampaniya keçirəcək.
BTRİB-in ATS-lərində istifadəçilərə müasir telefon rabitəsi xidmətləri göstərilməsi üçün quraşdırılmış tutumlardan hazırda 150 minə yaxın nömrə resursu boşdur.
|
