İran dağılsın, yoxsa demokratikləşsin?

Bütöv Azərbaycan Gənclər Təşkilatı (BAGT) və Bütöv Azərbaycan Hərəkatının (BAH) cümə axşamı Media Mərkəzində "Türkiyənin İran siyasəti və Güney Azərbaycan" mövzusundakı "dəyirmi masa"sında aparıcı fikir bu olub. Toplantıya siyasi partiyaların və vətəndaş cəmiyyəti institutlarının təmsilçiləri qatılıblar. BAGT rəhbəri Ruslan İzzətli Türkiyə və Azərbaycan dövlətlərinin Güney Azərbaycan siyasətini tənqid edərək hər iki dövləti İrana münasibətdə "dişsiz siyasət" yürütməkdə ittiham edib. Güney Azərbaycan türklərinin apardığı mübarizəyə münasibət fonunda hər iki dövlətin İrana yanaşmada sərt mövqe sərgiləməsi tələb olunub. Eyni zamanda hər iki dövlətdən Güney Azərbaycan türklərinə edilən zülmlərin beynəlxalq qurumların, ilk növbədə BMT-nin diqqətinə çatdırılması istənilib. Vətəndaş cəmiyyəti institutlarına isə öz imkanları daxilində Güney Azərbaycan türklərinin apardığı mübarizəni dünyanın diqqətinə çatdırmaq təklifi verilib ("Turan").

Güney Azərbaycanın istiqlalı məsələsinə münasibətdə fərqli mövqelər ortaya çıxıb. Bir sıra natiqlər İranın dövlət olaraq dağılmasını şərt olaraq qeyd etdikləri halda, digər bir qisim İranın demokratikləşmə zərurətini önə çəkib. Buna səbəb kimi isə İran dövlətini azərbaycanlıların qurması göstərilib və İran demokratikləşdiyi halda sayca üstün etnos olaraq hakimiyyətin azərbaycanlıların əlində olacağı qeyd edilib.

Toplantıya qatılan Güney Azərbaycan təmsilçiləri Quzey Azərbaycan məmurlarını istər Güney Azərbaycanda yaşayan, istərsə də Qüzey Azərbaycana gələn güneyli türklərə mənfi münasibətdə suçlayıblar. Belə ki, Güney Azərbaycandan gələn azərbaycanlıların işlə, yaşayışla təmin olunmadıqları nəzərə çatdırılıb. İranla Azərbaycan arasında ekstradisiya sazişi olmadığı halda bəzi güneyli fəalların İran orqanlarına təhvil verilməsi halları xatırladılıb.

Toplantı iştirakçıları hazırda Güney Azərbaycanda mübarizənin fəal fazaya keçdiyini vurğulayaraq Azərbaycan KİV-lərini bu prosesi diqqət mərkəzində saxlamağa və onların səslərini dünyaya çatdırmağa çağırıblar.