Qadın hüquqlarının müdafiəsi və onlara yardım istiqamətində fəaliyyət göstərən bir neçə təşkilat tərəfindən "Qadınlara Zorakılıq Əleyhinə Müdafiə Komitəsi" təsis olunub. Komitəni "Təmiz Dünya" Qadınlara Yardım İctimai Birliyinin sədri Mehriban Zeynalova, "Qadın Profilaktika və Məsləhət Mərkəzi"nin sədri Fəridə Əsgərova, "Siyasi Plüralizm" İnstitutunun sədri Sevil Həmidova, "Lex Consult" Hüquq Şirkətinin direktoru Ruslan Vəliyev, müstəqil ekspert, psixoloq Samir Əhmədov yaradıb.
"Qadınlara Zorakılıq Əleyhinə Müdafiə Komitəsi", ölkədə qadınlara qarşı siyasi, iqtisadi, ictimai zəmində baş vermiş bütün zorakılıq halları ilə bağlı monitorinqləri, problemin həlli yönündə ictimai vəkillik fəaliyyətini və beynəlxalq səviyyədə mövcud təcrübəni milli dəyərlərimizə uyğunlaşdıraraq həyata keçirmək niyyətindədir. "Qadınlara Zorakılıq Əleyhinə Müdafiə Komitəsi", zorakılıq qurbanları olan qadınların fərdi müraciətlərinə əsasən, onların hüquqlarının müdafiəsini təşkil edəcək.
Mehriban Zeynalova bizimlə söhbətində bildirdi ki, bu il ailədaxili zorakılıq nəticəsində 107 nəfər həyatını itirib ki, bunlardan 53-ü qadın, 48-i kişi, 6-sı isə uşaqdır. Zeynalovanın sözlərinə görə, ailədaxili zorakılıqda psixoloji zərbələrə dözməyən 57 qadın intihar edib. Keçən il isə 109 qadın ailədə zorakılıq nəticəsində həyatını itirib, 68 nəfər qadının həyatına qəsd edilib. Ümumilikdə keçən il ərzində 110 nəfər intihar edib. Birlik sədri onu da qeyd etdi ki, bu gün məhkəməyə boşanmaq üçün müraciət edən qadınların əksəriyyəti zorakılığa məruz qalanlardır. "Son vaxtlar ailədə zorakılığın artması hallarına mətbuatda da geniş rast gəlmək olar. Təəssüf ki, həmin zorakılığın qurbanı isə əksərən qadınlar olur". Zeynalova ailədaxili zorakılıqla üzləşmiş insanlar üçün xüsusi sosial xarakterli mərkəzlərin yaradılmasını vacib sayır. "Ailədə zorakılığa məruz qalanlar üçün xüsusi reabilitasiya mərkəzləri olmalıdır. Ailəni qoruyub saxlamaq vacib olduğundan mübahisəli ailələrə düşünmə dövrü üçün mərkəzlər yaradılmalıdır. Bu mərkəzlərdə problemli ailələr psixoloji və hüquqi yardım almalıdır. Bundan başqa, istiqamətləndirmə və yardım mərkəzləri də fəaliyyət göstərməlidir" deyən birlik sədrinə görə, belə mərkəzlərin regionlarda açılması vacibdir. O, ailə təməlini kökündən sarsıdan zorakılıq və intihar hallarını azaltmaq məqsədi ilə təhlükəsizlik sığınacaqlarının mühüm rol oynayacağını hesab edir.
"Təmiz Dünya" Qadınlara Yardım İB zorakılığa məruz qalmış qadınlara təmənnasız psixoloji, tibbi və hüquqi yardımlar göstərməklə yanaşı, həm də insan alveri və ailədə zorakılığa məruz qalmış qadınların reabilitasiyası və reinteqrasiyası ilə məşğuldur.
|
