Yəqin ki, bəzi qadınların südünün az olması, döşdən əmizdirmənin ağrılı və hətta qadın üçün zərərli olması, yay aylarında uşağa əlavə maye verilməsi barədə fikirlər eşitmisiniz. Pediatr Cek Nyumen döşdən əmizdirmə ilə bağlı ən geniş yayılmış miflərə aydınlıq gətirir.
Mif 1...
Döş formasını itirir
Sizin uşağı əmizdirib-əmizdirmədiyinizdən asılı olmayaraq, döş formasını dəyişir. Lakin bu, o demək deyil ki, o, mütləq formasını dəyişəcək və daha gözəl olmayacaq. Döşün gözəl formasını saxlamaq üçün hələ hamiləlik dövründə xüsusi kompleks məşğələlər etmək, xüsusi alt paltar geyinmək, gələcək analar və döşlə əmizdirən analar üçün hazırlanmış xüsusi kosmetik vasitələrdən istifadə edilməlidir.
Mif 2...
Qeysər kəsiyindən sonra döşlə əmizdirmək olmaz
Bəzən bu əməliyyat laktasiyanın ləngiməsi ilə müşayiət edilir. Cərrahi müdaxilədən sonra qadın adi doğuşla müqayisədə çox zəifləyir. Və bir müddət narkozun təsiri altında olur. Bu səbəbdən körpə doğulan kimi döşə qoyulmur. Ona görə də süd bir qədər gec yarana bilər. Lakin son vaxtlar bu əməliyyatı yer narkozla - epidural anesteziya ilə edirlər. Bu halda qadının şüuru özündə olur və doğuşdan sonra uşaq döşə qoyula bilər. Bir də əgər vaxtilə doğuşdan sonra analar antibiotik qəbul edirdilər ki, bu da döşdən əmizdirməyi ləngidirdi. İndi vəziyyət fərqlidir. Belə ki, yeni, laktasiyaya və uşağa zərərsiz dərmanlar çıxıb.
Mif 3...
Döşdən əmizdirmə sağlamlığa zərərdir
Deyirlər ki, uşaq ananın bütün suyunu sorur. Bu fikirdə müəyyən mənada həqiqət var. Lakin körpəsinə süd verən analar vitamin qəbul edib və yaxşı qidalanarsa, çətin ki, xarici görünüşdə mənfiyə doğru dəyişiklik olsun.
Mif 4...
İsti havalarda uşağa əlavə maye verilməlidir
Ana südündə uşağın tələbatını ödəyəcək maye var. Yəni əlavə mayenin verilməsinə ehtiyac yoxdur.
Mif 5...
Südəmər uşaqların D vitamininə ehtiyacı var
Fövqəladə hallar istisna olmaqla, buna lüzum yoxdur. Ancaq anada və südəmər körpədə D vitamini çatışmazlığı müşahidə edildikdə onu qəbul etmək olar.
Mif 6...
Körpəni əmizdirməzdən öncə hər dəfə döşün giləsini yumaq lazımdır
Əksinə, süni qidalandırma təmizliyə ciddi riayət edilməsini tələb edir. Çünki süni qida uşağı infeksiyalardan müdafiə etmir. Təmizliyə riayət etmədikdə bakteriyaların çoxalması üçün bir mənbə rolunu oynayır. Ana südü isə uşağı infeksiyalardan qoruyur. Hər əmizdirmə zamanı gilələri yumaq onun müdafiə yağını yuyub aparır.
Mif 7...
Ana dərman qəbul edirsə, uşağı əmizdirməməlidir
Çox az sayda dərmanlar var ki, körpəsini əmizdirən analar onu ehtiyatla qəbul etməlidir. Dərmanların az hissəsi ana südündə özünü büruzə verir. Lakin adətən bu, əhəmiyyətsiz olur və buna diqqət yetirməyə lüzum yoxdur. Əgər hansısa dərman uşaq üçün, həqiqətən də, təhlükə yaradırsa, onu başqası ilə dəyişmək daha yaxşı olardı.
Mif 8...
Ana südündə kifayət qədər dəmir yoxdur
Südəmər uşaq üçün ana südündə dəmir kifayət qədərdir. Əgər körpə vaxtında doğulubsa, onda ana südündəki dəmir ona kifayət edəcək. Ən əsası ilk altı ayına qədər. Süni qidada dəmirin miqdarı daha yüksəkdir. Lakin bu, sadəcə, təminat məsələsidir. Məsələ ondadır ki, süni qidanın tərkibindəki dəmir körpə tərəfindən yaxşı mənimsənilmir və təbii yolla bədəndən xaric olunur. Ümumiyyətlə, ilk altı ayda ana südünü dəmirlə zənginləşdirməyə lüzum yoxdur.
|
