Türkmənistan hakimiyyəti İrana müalicəyə getmiş dövlət qulluqçularını üzə çıxarmağa başlayıb. "Türkmenistan xronikası" nəşrinin məlumatına əsasən, cari il avqustun ortalarında rəsmi olmayan mənbələr bildirib ki, son zamanlar İranda özü müalicə olunmuş, yaxud qohumunu ora bu məqsədlə göndərən dövlət qulluqçuları aşkarlanıb üzə çıxarılır.
Türkmənistan mətbuatı hesab edir ki, İranın səhiyyəsi "Türkmənistandan yüksək olmaqla yanaşı, nə Almaniya, nə də İsraildən geri qalır, qiymətlər də qaneedicidir. Bunun üçün viza alıb İrana yollanmaq yetərlidir".
Lakin məlumatda o da bildirilib ki, dövlət qulluqçuları və onların yaxın qohumlarının Türkmənistanda deyil, İranda müalicə olunduğu aydınlaşarsa, bu, həmin məmurun vəzifə karyerasına ləkə salacaq: "Belələri dövlət qulluğunda irəliləməyi unutmalıdır. Onlar etibarlı dövlət adamı sayılmır".
Türkmənistanda Türkiyə mənşəli Fətulla Gülən məktəbləri də qapadıla bilər. Bu cərəyana qısqanclıqla yanaşan İran tərəfi bundan məmnundur. Xəbəri də onlar yayıb. İran mətbuatına görə, bu məktəblər ölkənin idarəetmə, mədəni qurumlarına girişməyə çalışır, seçdiyi saf türkmən gənclərini "ABŞ üçün casusluğa hazırlayır". Türkmənistan hakimiyyəti Türkiyə mənşəli "Nur Camaatı"nın ölkədə dini-siyasi nüfuzundan duyduğu narahatlıq üzündən 1990-cı ildən bəri fəaliyyət göstərən bu məktəblərdə yoxlamalara başlayıb.
Türkmənistan mətbuatına əsasən, Aşqabadda yalnız Mustafa Kamal Atatürk adına "türk məktəbi" fəaliyyət göstərməkdədir. Ona da şagirdlər təhsilini bitirənədək fəaliyyət göstərməyə icazə verilib. Bu il isə "nurçuların" məktəbinə şagird qəbul edilməyib.
Uyğun olay Özbəkistanda da baş verib. Bir neçə il öncə oradakı məktəblər də qapadılmışdı. Rəsmi Daşkənd bu məktəblərdə "nurçuların" hazırlandığını əsas göstərmişdi.
Baş verənlərdən Tehranın sevinməsi anlaşılandır. Çünki İran hakimiyyəti Türkmənistanla Türkiyənin yaxınlaşmasını heç istəmir.
|
